پی ٹی آر سے ریلوے اسٹیشنوں کو ہٹانے کی تجویز کے خلاف زبردست احتجاج

چھپادوہرا اور ہے ہے گڑھا اسٹیشن دیہی عوام کی لائف لائن ہیں، ایم ایل اے رام چندر سنگھ

جدید بھارت نیوز سروس
لاتیہار، 13 مئی: لاتہار ضلع میں واقع پلامو ٹائیگر ریزرو (PTR) کے کور ایریا سے چھپادوہرا اور ہے ہے گڑھا ریلوے اسٹیشنوں کو ہٹانے اور ریلوے روٹ کو ڈائیورٹ کرنے کی تجویز کے خلاف عوامی غم و غصہ پھوٹ پڑا ہے۔ بدھ کے روز چھپادوہرا اسٹیشن کے احاطے میں ‘سرو دلیہ سنگھرش سمیتی ‘ کے بینر تلے بڑے پیمانے پر احتجاجی مظاہرہ کیا گیا، جس میں مختلف سیاسی جماعتوں کے لیڈروں اور سینکڑوں دیہاتیوں نے شرکت کی۔ مظاہرے میں شامل منیکا کے ایم ایل اے رام چندر سنگھ نے سخت رخ اختیار کرتے ہوئے کہا کہ یہ دونوں ریلوے اسٹیشن علاقے کے لوگوں کے لیے ‘لائف لائن ‘ کی حیثیت رکھتے ہیں اور انہیں کسی بھی صورت میں یہاں سے ہٹنے نہیں دیا جائے گا۔ انہوں نے کہا کہ اگر یہ اسٹیشن ختم کیے گئے تو دیہاتیوں کو ضلع ہیڈکوارٹر تک پہنچنے کے لیے سڑک کے ذریعے دوگنا فاصلہ طے کرنا پڑے گا، جو کہ غریب عوام کے ساتھ ناانصافی ہے۔ انہوں نے حکومت سے مطالبہ کیا کہ جنگلی حیات کے تحفظ کے لیے اسٹیشن ہٹانے کے بجائے کوئی متبادل راستہ نکالا جائے۔ سمیتی کی صدر بیرونکا کجور اور جے ایم ایم کے بلاک صدر ششی بھوشن تیواری نے واضح کیا کہ دیہاتی اس فیصلے کے خلاف متحد ہیں اور ہر سطح پر اس کی مخالفت کی جائے گی۔ احتجاج کے دوران بی جے پی، جے ایم ایم اور دیگر جماعتوں کے نمائندوں نے بھی اسٹیشنوں کی ترقی کو ناگزیر قرار دیا۔ اس موقع پر بیہمانند گری، نسیم انصاری، سنیتا کماری اور بڑی تعداد میں مقامی مرد و خواتین موجود تھے جنہوں نے اسٹیشن ہٹانے کے خلاف نعرے بازی کی۔