بہار میں کسانوں کی ڈیجیٹل شناخت کا دوسرا مرحلہ شروع

وزیر زراعت وجے کمار سنہا نے کسانوں میں فارمر آئی ڈی تقسیم کی

پٹنہ: وزیر زراعت بہار وجے کمار سنہا نے آج زرعی بھون کے آڈیٹوریم سے پٹنہ ضلع کے پھلواری شریف بلاک کے کسانوں کی فارمر آئی ڈی بنانے کے ساتھ فارمر رجسٹری کے دوسرے مرحلے کا آغاز کیا۔ اس موقع پر وزیر زراعت نے پھلواری شریف بلاک کے پانچ کسانوں لچھمینیا دیوی، سنیل کمار سنگھ، رام پرویش سنگھ، اجے کمار اور اودے کمار کو فارمر آئی ڈی تقسیم کی۔وجے کمار سنہا نے اپنے خطاب میں کہا کہ آج بہار کے زرعی شعبے کے لیے ایک تاریخی اور قابل فخر لمحہ ہے۔ آج ہم اس ڈیجیٹل انقلاب کے دوسرے مرحلے کا آغاز کر رہے ہیں جو ہمارے ان داتاوں کی زندگی میں خوشحالی اور شفافیت کی نئی صبح لے کر آئے گا۔ یہ پہل وزیر اعظم نریندر مودی کے اس عظیم وژن کا حصہ ہے جس میں انہوں نے ڈیجیٹل انڈیا کے ذریعے ملک کے آخری شخص کو بااختیار بنانے کا خواب دیکھا ہے۔
وزیر اعظم کا ماننا ہے کہ جب ٹیکنالوجی اور کسان کا میل ہوگا تبھی بھارت کی دیہی معیشت خود کفیل بنے گی۔انہوں نے کہا کہ ایگری اسٹیک اسی سمت میں ایک انقلابی قدم ہے جو بچولیوں کی دیوار کو گرا کر براہ راست حکومت اور کسان کے درمیان ایک مضبوط پل بنا رہا ہے۔ ساتھ ہی گڈ گورننس سے ترقی یافتہ بہار بنانے کے عزم کو شرمندہ تعبیر کرنا ہم سب کی ذمہ داری ہے۔ محکمہ زراعت نے زرعی روڈ میپ کے ذریعے بہار کے کسانوں کی خوشحالی کو ترجیح دی ہے۔ زرعی روڈ میپ میں محکمہ زراعت کے ساتھ محکمہ محصولات و اراضی اصلاحات بھی پہلے سے جڑا ہوا ہے۔ آج محکمہ زراعت اور محکمہ محصولات کا یہ حیرت انگیز تال میل اسی دور اندیش سوچ کا نتیجہ ہے۔وزیر موصوف نے کہا کہ ماضی میں محکمہ محصولات و اراضی اصلاحات کے وزیر کی حیثیت سے ہم نے برسوں سے زیر التواء میوٹیشن اور تطہیر (پری مارجن) کو محکمانہ پورٹل کے ذریعے جنگی بنیادوں پر نافذ کرایا جس کے نتیجے میں فارمر رجسٹری کی یہ تاریخی کامیابی حاصل ہوئی۔ ریاست میں کل 4 کروڑ 54 لاکھ جمع بندی قائم ہے۔ محکمہ زراعت کے پورٹل پر اب تک 88 لاکھ 40 ہزار کسانوں کا ای-کے وائی سی مکمل کیا گیا ہے۔ جس میں سے 47 لاکھ 85 ہزار کسانوں کی فارمر آئی ڈی بنی ہے۔ بقیہ 40 لاکھ 54 ہزار کسانوں کی فارمر آئی ڈی تیار کی جانی ہے۔ ہمارا عزم ہے کہ ریاست کے تمام کسانوں کی فارمر آئی ڈی بنے گی۔انہوں نے کہا کہ پہلے مرحلے میں ہم نے 47 لاکھ 85 ہزار سے زائد کسانوں کا کامیاب رجسٹریشن کر کے ایک ایسا ریکارڈ قائم کیا ہے جس کا چرچا آج پورے ملک میں ہو رہا ہے۔
یعنی ہم نے 55 فیصد سے زائد ہدف حاصل کر لیا ہے جس میں پی ایم کسان کے کل 23 لاکھ 79 ہزار کسانوں کی فارمر آئی ڈی بھی شامل ہے۔ یعنی پی ایم کسان کے مستفید کسانوں میں سے 28 فیصد کسانوں کی فارمر آئی ڈی بن چکی ہے۔ ہمارے افسران اور ملازمین نے جس لگن سے کام کیا اسی کا نتیجہ ہے کہ حکومت ہند سے ہمیں 269 کروڑ 88 لاکھ روپے کی ترغیبی رقم حاصل ہوئی ہے۔وجے کمار سنہا نے کہا کہ آج سے شروع ہونے والا یہ دوسرا مرحلہ ایک مشن ہے۔ ہمارا ہدف ہے کہ بہار کا ایک بھی کسان اس ڈیجیٹل ڈیٹا بیس سے محروم نہ رہے۔ یہ رجسٹری محض ایک نمبر نہیں ہے بلکہ یہ کسان کا شناختی کارڈ ہے۔ اس سے کھاد، بیج، قرض اور فصل امداد کا فائدہ بغیر کسی رکاوٹ کے براہ راست کسانوں کے کھاتے میں پہنچے گا۔
یہ ٹیکنالوجی کسانوں کو اپنی زمین پر فصل کی پیداوار کا اصل حقدار بنائے گی۔ انہوں نے اجلاس میں موجود چیف سکریٹری، محکمہ زراعت کے پرنسپل سکریٹری اور محکمہ محصولات و اراضی اصلاحات کے سکریٹری کا شکریہ ادا کیا اور کہا کہ ان تمام افسران نے محصولات اور زراعت کو ایک لڑی میں پرو کر اس پیچیدہ کام کو انتہائی آسان بنا دیا ہے۔چیف سکریٹری بہار پرتیہ امرت نے کہا کہ ڈیجیٹل پلیٹ فارم کا مقصد مکمل شفافیت برقرار رکھنا ہے تاکہ کسانوں کو اسکیموں کا فائدہ لینے کے لیے کسی دفتر نہ جانا پڑے۔ انہوں نے کہا کہ فارمر آئی ڈی بن جانے سے کسانوں کو کھیتی کا پورا آئیڈیا ریئل ٹائم میں مل جائے گا۔ فارمر رجسٹری ہونے پر کسانوں کی زمین کی خود بخود تصحیح ہو جائے گی اور انہیں اس کے لیے دفاتر کے چکر نہیں لگانے پڑیں گے۔پرنسپل سکریٹری محکمہ زراعت بہار نرمدیشور لال نے کہا کہ فارمر رجسٹری حکومت کا ایک پرجوش منصوبہ ہے۔ آج ہم اس کے دوسرے مرحلے کا آغاز کرنے جا رہے ہیں۔ تمام کسانوں سے اپیل کرتے ہیں کہ محکمہ زراعت کی طرف سے چلائی جا رہی اسکیموں کا فائدہ لینے کے لیے وہ فارمر آئی ڈی ضرور بنوائیں۔ انہوں نے کہا کہ ملک میں جب یو پی آئی کی شروعات کی گئی تھی اس وقت اس کا مطلب سمجھ نہیں آیا تھا لیکن آج یو پی آئی کو ملک میں ہی نہیں بیرون ملک میں بھی شناخت مل رہی ہے۔اس موقع پر سکریٹری محکمہ محصولات و اراضی اصلاحات بہار جئے سنگھ، محکمہ زراعت کے خصوصی سکریٹری بیریندر پرساد یادو، ڈائریکٹر زراعت سوربھ سمن یادو، ڈائریکٹر باغبانی ابھیشیک کمار سمیت محکمے کے سینئر افسران، ملازمین اور کسان موجود تھے۔