’ایس آئی آر‘ امدادی مرکز کاہوا افتتاح، ووٹر مسائل کے حل کیلئےنئی پہل

جمہوریت کی مضبوطی کیلئے ہر شہری کا ووٹر لسٹ میں درست اندراج ضروری: شمشیر عالم

جدید بھارت نیوز سروس
رانچی ، 11؍ مئی: جھارکھنڈ تنظیم کے مرکزی دفتر میں سوموار کو “SIR امدادی مرکز” (SIR سہایتا کیندر) کا باقاعدہ افتتاح کیا گیا۔ اس موقع پر تنظیم کے مرکزی صدر اور اقلیتی کمیشن کے نائب صدر نے فیتہ کاٹ کر مرکز کا آغاز کیا۔ پروگرام میں تنظیم کے عہدیداروں، کارکنوں اور عام لوگوں کی بڑی تعداد نے شرکت کی۔افتتاحی تقریب سے خطاب کرتے ہوئے عالم نے کہا کہ “SIR امدادی مرکز” کا مقصد عام عوام کے مسائل کا فوری اور مؤثر حل یقینی بنانا ہے۔ انہوں نے کہا کہ موجودہ وقت میں کئی ریاستوں میں ووٹر لسٹ سے نام ہٹانے، غلط معلومات درج ہونے اور ووٹروں کو ان کے آئینی حقوق سے محروم کرنے جیسی شکایات مسلسل سامنے آ رہی ہیں۔ ایسے میں یہ امدادی مرکز لوگوں کو بیدار کرنے اور ان کے مسائل کے حل میں اہم کردار ادا کرے گا۔انہوں نے کہا کہ اس مرکز کے ذریعے ووٹر لسٹ میں نیا نام شامل کرنے، نام اور پتہ میں درستگی کرانے، آدھار کارڈ کو ووٹر آئی ڈی سے لنک کرانے، ووٹر شناختی کارڈ سے متعلق غلطیوں کو ٹھیک کرانے سمیت دیگر انتخابی مسائل کے حل میں لوگوں کی مدد کی جائے گی۔ اس کے لیے تربیت یافتہ کارکنوں کی ایک ٹیم تعینات کی گئی ہے، جو عام شہریوں کی رہنمائی کرے گی اور ضروری طریقہ کار میں تعاون فراہم کرے گی۔عالم نے کہا کہ جمہوریت کو مضبوط بنانے کے لیے ہر شہری کا ووٹر لسٹ میں صحیح طریقے سے درج ہونا انتہائی ضروری ہے۔ انہوں نے لوگوں سے اپیل کرتے ہوئے کہا کہ وہ وقتاً فوقتاً اپنے ووٹر شناختی کارڈ اور ووٹر لسٹ کی معلومات کی جانچ کرتے رہیں اور کسی بھی قسم کی پریشانی ہونے پر “SIR امدادی مرکز” سے رابطہ کریں۔انہوں نے مزید کہا کہ تنظیم کا مقصد صرف مسائل کا حل کرنا ہی نہیں، بلکہ لوگوں میں جمہوری حقوق اور فرائض کے تئیں بیداری پیدا کرنا بھی ہے۔ یہ مرکز خاص طور پر ان لوگوں کے لیے مددگار ثابت ہوگا جنہیں سرکاری طریقہ کار کی معلومات کم ہے یا جو تکنیکی وجوہات کی بنا پر درخواست نہیں دے پاتے ہیں۔پروگرام میں فہیم احمد، تنویر گدی، سرور خان، محمد سیفی، محمد علی، محمد کلام، محمد فیروز، محبوب، آصف خان، محمد عارف، عبدالرحمن سمیت بڑی تعداد میں کارکنان اور عام لوگ موجود تھے۔ پروگرام کے اختتام پر موجود لوگوں نے اس پہل کی ستائش کرتے ہوئے اسے عوامی مفاد اور جمہوری بیداری کی سمت میں ایک اہم قدم قرار دیا۔