پارٹی مخالف سرگرمیاں: کرناٹک کانگریس نے ایم ایل سی عبدالجبار کو معطل کر دیا

بنگلورو 15 اپریل ( یو این آئی)کرناٹک پردیش کانگریس کمیٹی ( کے پی سی سی ) نے قانون ساز کونسل کے رکن ( ایم ایل سی ) کے عبدالجبار کو پارٹی کی بنیادی رکنیت سے معطل کر دیا ہے۔ ان پر حالیہ ‘داونگیرے ساؤتھ اسمبلی ضمنی انتخاب کے دوران پارٹی مخالف سرگرمیوں میں ملوث ہونے کا الزام ہے۔کے پی سی سی کے صدر اور نائب وزیر اعلیٰ ڈی کے شیوکمار کی جانب سے جاری کردہ سرکاری حکم نامے کے مطابق، عبدالجبار کی معطلی فوری طور پر نافذ العمل ہوگی۔ پارٹی کا موقف ہے کہ انہوں نے 9 اپریل کو ہونے والے ضمنی انتخاب کے دوران تنظیم کے مفادات کے خلاف کام کیا۔پارٹی ذرائع کے مطابق عبدالجبار داونگیرے ساؤتھ سے انتخاب لڑنے کے لیے ٹکٹ کے خواہشمند تھے، تاہم پارٹی نے ان کے بجائے سمرتھ ملکارجن کو امیدوار نامزد کیا۔ الزام ہے کہ ٹکٹ نہ ملنے پر عبدالجبار نے انتخابی مہم کے دوران مخالف امیدواروں کی حمایت کی۔آل انڈیا کانگریس کمیٹی ( اے آئی سی سی ) کے مبصرین کی رپورٹ میں نشاندہی کی گئی کہ اقلیتی قیادت کے کچھ حصوں نے انتخابی عمل کے دوران منظم طریقے سے پارٹی فیصلوں کی مخالفت کی۔اس تادیبی کارروائی سے قبل ہی عبدالجبار نے کے پی سی سی کے اقلیتی شعبہ کے صدر کے عہدے سے استعفیٰ دے دیا تھا۔ انہوں نے ٹکٹوں کی تقسیم اور فیصلہ سازی میں اقلیتی رہنماؤں کو نظر انداز کیے جانے پر سخت عدم اطمینان کا اظہار کیا تھا۔وزیر اعلیٰ سدارمیا نے اشارہ دیا ہے کہ اے آئی سی سی رپورٹ کی روشنی میں مزید کئی رہنماؤں کے خلاف تادیبی کارروائی کی جا سکتی ہے۔ پارٹی ہائی کمان کو اندرونی سازش کی شکایات موصول ہوئی تھیں جن کا مقصد داونگیرے ساؤتھ میں کانگریس کے سرکاری امیدوار کو شکست دینا تھا۔تجزیہ کاروں کا کہنا ہے کہ اس معطلی نے کرناٹک کانگریس کے اندرونی دھڑے بندیوں اور اقلیتی قیادت کے درمیان پائے جانے والے تناؤ کو بے نقاب کر دیا ہے۔ یہ قدم پارٹی قیادت کی جانب سے نظم و ضبط برقرار رکھنے اور مستقبل کے چیلنجز سے نمٹنے کے لیے ایک سخت پیغام کے طور پر دیکھا جا رہا ہے۔