رسوئی گیس کی ضرورت کا دس فیصد امریکہ سے درآمد کیا جائے گا: ہردیپ پوری

نئی دہلی، 9 فروری (یو این آئی) پیٹرولیم اور قدرتی گیس کے وزیر ہردیپ سنگھ پوری نے پیر کے روز راجیہ سبھا میں بتایا کہ حکومت ملک کی توانائی کی ضروریات کے لیے سپلائی کو مناسب، قابلِ اعتماد اور مناسب لاگت پر برقرار رکھنے کی پالیسی پر عمل پیرا ہے اور ہندوستان اپنی ضرورت کی 10 فیصد رسوئی گیس امریکہ سے خریدے گا۔ مسٹر پوری نے ایوان میں وقفہ سوالات کے دوران اپنی وزارت سے متعلق ضمنی سوالات کے جواب میں یہ بھی بتایا کہ اس وقت ملک میں پیٹرولیم کی مجموعی ریفائننگ صلاحیت 26 کروڑ ٹن ہے، جو آگے چل کر 40 کروڑ ٹن تک پہنچ جائے گی۔ انہوں نے کہا کہ ہندوستان تیل کی ریفائننگ کے شعبے میں دنیا کا چوتھا بڑا صلاحیت رکھنے والا ملک بن کر مزید مضبوط مقام حاصل کرے گا۔مسٹر پوری نے ایک سوال کے جواب میں کہا کہ ملک کی ضرورت کی 10 فیصد رسوئی گیس (ایل پی جی) امریکہ سے درآمد کرنے کا معاہدہ کیا گیا ہے، حالانکہ ہندوستان پیٹرولیم مصنوعات کے شعبے میں دنیا کا پانچواں سب سے بڑا برآمد کنندہ ہے۔ انہوں نے کہا کہ ہندوستان میں ایل پی جی کنکشنز کی تعداد 2024 میں تقریباً 14 کروڑ تھی، جو اب بڑھ کر 33 کروڑ تک پہنچ گئی ہے۔ مسٹر پوری نے گجرات کے علاقے میں نکلنے والے خام تیل کی ریفائننگ کے لیے پٹن کے آس پاس نئی ریفائنری قائم کرنے کی تجویز پر کہا کہ ہندوستان میں تیل ریفائنریوں کی علاقائی تقسیم پہلے ہی خاصی متوازن ہے۔ ملک میں اس وقت پیٹرولیم ریفائننگ کی مجموعی صلاحیت 26 کروڑ ٹن ہے اور جاری منصوبوں کے مکمل ہونے کے بعد یہ 32 کروڑ ٹن تک پہنچ جائے گی۔پیٹرولیم وزیر نے کہا کہ آئندہ ملک میں پیٹرولیم ریفائننگ کی صلاحیت کے 40 کروڑ ٹن تک پہنچنے کا امکان ہے اور ہندوستان اس شعبے میں چار بڑے ممالک میں مضبوط صلاحیت رکھنے والا ملک ہوگا۔ انہوں نے کہا کہ گجرات میں نایرا انرجی اور ریلائنس انڈسٹریز کی بالترتیب دو کروڑ ٹن اور ساڑھے تین کروڑ ٹن صلاحیت کی دو بڑی ریفائنریاں پہلے ہی کام کر رہی ہیں۔ انہوں نے کہا کہ آنے والے وقت میں کئی ممالک میں، جہاں تیل ریفائننگ کی صلاحیت کم ہے، وہاں تیل ریفائننگ کا کام معاشی طور پر شاید قابلِ عمل نہ رہے۔ ایک اور سوال کے جواب میں مسٹر پوری نے کہا کہ ملک کا محفوظ شدہ پیٹرولیم ذخیرہ 74 دن کی ضرورت کے لیے کافی ہے، جو آگے چل کر مزید بڑھ سکتا ہے۔ انہوں نے کہا کہ بین الاقوامی توانائی ایجنسی نے ممالک کے لیے 90 دن کے پیٹرولیم ذخیرے کی سفارش کی ہے۔ انہوں نے کہا کہ ہندوستان تیل کی پیداوار بھی کرتا ہے۔