جنوبی لبنان کے ایک گاؤں پر اسرائیلی فضائی حملے میں ایک شہری ہلاک اور نو دیگر زخمی ہو گئے۔لبنان کے فوجی ذرائع نے نام ظاہر نہ کرنے کی شرط پر چین کی خبر رساں ایجنسی ژنہوا کو بتایا کہ اسرائیلی ڈرون نے دو کاروں پر چھ میزائل داغے جس کے نتیجے میں پہلی کار میں سوار ایک شہری ہلاک اور دوسری کار میں سوار آٹھ افراد زخمی ہوگئے ، شہر کے شمال میں البرغولی گاؤں میں سائیکل سوار شخص زخمی ہوا۔ انہوں نے کہا کہ اسرائیلی جنگی طیاروں نے منگل کے روز جنوبی لبنان کے سرحدی علاقے میں چار قصبوں اور گاؤوں کو نشانہ بنایا، جس سے کئی گھر تباہ ہوگئے یا انہیں نقصان پہنچا۔
اس دوران اسرائیلی ڈیفنس فورسز نے سوشل میڈیا پلیٹ فارم ایکس پر بمباری کی جانے والی دو کاروں کی تصاویر پوسٹ کیں اور کہا کہ اس کے طیاروں نے حزب اللہ کی ’یو اے وی (بغیر پائلٹ کے فضائی گاڑی) لانچ ٹیموں پر حملہ کیا۔گزشتہ چند دنوں کے دوران، جنوبی لبنان کے سرحدی گاؤں اور قصبوں میں حزب اللہ اور اسرائیلی افواج کے درمیان غیر معمولی کشیدگی دیکھنے میں آئی ہے۔
فوجی ذرائع نے بتایا کہ لبنانی فوج کی پوزیشنوں نے دوپہر کے وقت جنوبی لبنان سے شمالی اسرائیل کی طرف زمین سے زمین پر مار کرنے والے متعدد میزائلوں اور کئی ڈرونز کے داغے جانے پر نظر رکھی۔ حزب اللہ کے ایک ذریعے نے منگل کے روز العربی الجدید ٹی وی کو بتایا کہ حزب اللہ دریائے لیطانی سے آگے نہیں ہٹے گی۔ ذرائع کے مطابق تنازع کے خاتمے کے لیے کسی معاہدے تک پہنچنے کے لیے یہ اسرائیلی شرط ہے۔ذرائع نے بتایا کہ ’’صرف غزہ پٹی میں جنگ روکنا لبنانی محاذ کو متاثر کرے گا اور ڈھانچے سے باہر تمام فریقوں کی کوششیں (تناؤ ختم کرنے کے لئے) بے سود ہیں۔‘‘
