انگلینڈ کو چوتھے ٹی 20 میں 5 وکٹوں سے شکست دی
گراس آئیلیٹ، 17 نومبر (یو این آئی) اوپنرز ایون لوئس (68) اور شی ہوپ (54) کی طوفانی اننگز کی بنیاد پر ویسٹ انڈیز نے انگلینڈ کو چوتھے ٹی 20 میچ میں چھ گیندیں باقی رہ کر پانچ وکٹ سے شکست دے دی۔219 رنز کے بڑے ہدف کے تعاقب میں اوپنرز ایون لوئس اور شی ہوپ کی جوڑی نے ویسٹ انڈیز کے لیے دھماکہ خیز آغاز کیا اور پہلی وکٹ کے لیے 9.1 اوورز میں 136 رنز جوڑے۔ 10ویں اوور میں ریحان احمد نے ایون لوئس کو آؤٹ کر کے انگلینڈ کو پہلی کامیابی دلائی۔ ایون لوئس نے 31 گیندوں پر 68 رنز کی اننگز کھیلی جس میں سات چھکے اور چار چوکے شامل تھے۔ اگلی ہی گیند پر شی ہوپ رن آؤٹ ہو گئے۔ شی ہوپ نے 24 گیندوں میں سات چوکے اور تین چھکے لگا کر (54) رنز بنائے۔ ریحان نے اسی اوور کی تیسری گیند پر نکولس پوران (0) کو آؤٹ کر کے ویسٹ انڈیز کو بیک فٹ پر ڈال دیا۔ اس کے بعد کپتان روومین پاول نے پہلے شیمرون ہیٹمائر کے ساتھ چوتھی وکٹ کے لیے 36 رنز کی شراکت قائم کی۔ ریحان نے شمرون ہیٹمائر (سات) کو آؤٹ کر کے اپنی تین وکٹیں حاصل کیں۔ اس کے بعد بیٹنگ کے لیے آئے شرفن ردرفورڈ اور روومین پاول نے ٹیم کو فتح کی دہلیز پر پہنچا دیا۔ اس دوران جان ٹرنر نے پاول کو ایل بی ڈبلیو کر کے پویلین بھیج دیا۔ پاول نے 23 گیندوں میں تین چھکے اور دو چوکے لگا کر 38 رنز بنائے۔ شرفن ردرفورڈ (29) اور روسٹن چیس (نو) رنز بنانے کے بعد ناٹ آؤٹ رہے۔ ویسٹ انڈیز نے 19 اوورز میں پانچ وکٹوں پر 221 رنز بنائے اور میچ پانچ وکٹوں سے جیت لیا۔ پانچ میچوں کی سیریز میں یہ ویسٹ انڈیز کی پہلی جیت ہے۔انگلینڈ کی جانب سے ریحان احمد نے 43 رنز کے عوض تین اور جان ٹرنر نے ایک بلے باز کو آؤٹ کیا۔ اس سے قبل ویسٹ انڈیز نے ٹاس جیت کر پہلے گیند بازی کا فیصلہ کیا۔ انگلینڈ نے بیٹنگ کرتے ہوئے جیکب بیتھل (ناٹ آؤٹ 62)، فل سالٹ (55)، کپتان جوش بٹلر (38)، ول جیکس (25) اور سیم کرن (24) کی شاندار اننگز سے 20 اوورز میں پانچ وکٹوں پر 218 رنز بنائے۔ ویسٹ انڈیز کی جانب سے گڈاکیش موتی نے 40 رنز کے عوض دو وکٹیں حاصل کیں اور الزاری جوزف اور روسٹن چیز نے ایک ایک بلے باز کو آؤٹ کیا۔
