کہا : آدھی رات کو افسران کی تبدیلی جمہوریت پر خفیہ حملہ ہے
جدید بھارت نیوز سروس
کولکاتہ :مغربی بنگال کی وزیر اعلیٰ ممتابنرجی نے ریاست میں اعلیٰ افسران کی اچانک تبدیلی پر سخت ردعمل ظاہر کرتے ہوئے الیکشن کمیشن اور مرکز کی بی جے پی حکومت کو نشانہ بنایا ہے۔ انہوں نے الزام لگایا کہ رات کے وقت اچانک فیصلے لے کر ریاستی انتظامیہ میں تبدیلیاں کی گئیں، جو جمہوری روایت کے خلاف ہیں۔کولکاتہ میں کالج اسٹریٹ سے ڈورینا کراسنگ تک ایل پی جی بحران کے خلاف ایک بڑے احتجاجی جلوس کے بعد ممتا بنرجی نے دھرمتلا میں جلسے سے خطاب کرتے ہوئے کہا کہ چیف سکریٹری نندنی چکرورتی اور ہوم سکریٹری جگدیش پرساد مینا کو آدھی رات کے بعد عہدوں سے ہٹانا ایک ’خفیہ اور آمرانہ اقدام‘ہے۔ انہوں نے کہا کہ اس طرح کے فیصلے لینے سے پہلے ریاستی حکومت سے کوئی مشورہ نہیں کیا گیا۔ممتا بنرجی نے کہا کہ انہیں رات تقریباً ایک بجے اس تبدیلی کی اطلاع ملی۔ انہوں نے طنزیہ انداز میں کہا کہ کیا کبھی آدھی رات کو اس طرح فیصلے کیے جاتے ہیں؟ یہ ایسا لگتا ہے جیسے پردے کے پیچھے سے خفیہ حملہ کیا گیا ہو۔وزیر اعلیٰ نے دعویٰ کیا کہ ماضی میں روایت یہ تھی کہ ریاستی حکومت تین نام بھیجتی تھی اور الیکشن کمیشن ان میں سے ایک کا انتخاب کرتا تھا، لیکن اس بار اس طریقہ کار کو نظر انداز کر دیا گیا۔ ان کے مطابق یہ قدم مرکز کی سیاسی مداخلت کو ظاہر کرتا ہے۔ممتا بنرجی نے بی جے پی پر بنگالی مخالف اور خواتین مخالف رویہ اختیار کرنے کا بھی الزام لگایا۔ انہوں نے کہا کہ چیف سکریٹری نندنی چکرورتی ایک بنگالی خاتون افسر ہیں اور انہیں اچانک ہٹانا غلط پیغام دیتا ہے۔ ان کے مطابق صرف بنگالی افسران ہی نہیں بلکہ غیر بنگالی افسران کو بھی ہٹایا گیا ہے، جس سے ظاہر ہوتا ہے کہ یہ پورا معاملہ سیاسی انتقام پر مبنی ہے۔وزیر اعلیٰ نے اس موقع پر ایل پی جی گیس کے بحران کا معاملہ بھی اٹھایا۔ انہوں نے الزام لگایا کہ مرکز کی حکومت نے انتخابات سے پہلے جان بوجھ کر گیس بکنگ کا سرور بند کر کے مصنوعی بحران پیدا کیا ہے۔ ان کا کہنا تھا کہ اس سے عام لوگوں کو پریشانی کا سامنا کرنا پڑ رہا ہے۔وزیر اعظم نریندرمودی کی بریگیڈ پریڈ گراؤنڈ میں ہونے والی ریلی پر طنز کرتے ہوئے ممتا بنرجی نے کہا کہ بی جے پی کو ریلیوں میں ہجوم جمع کرنے کے بجائے عوام کو گیس فراہم کرنے پر توجہ دینی چاہیے۔ انہوں نے کہا کہ لوگوں کو گیس دو، گیس کے غبارے نہیں۔ممتا بنرجی نے بی جے پی لیڈروں کے بیانات پر بھی ناراضی ظاہر کرتے ہوئے کہا کہ اگر کسی نے ان کے گھر یا ریاستی وزراء کے گھروں پر حملہ کرنے کی کوشش کی تو ترنمول کانگریس اس کا بھرپور مقابلہ کرے گی۔سیاسی ماہرین کا کہنا ہے کہ اسمبلی انتخابات کے قریب آتے ہی ریاست میں سیاسی کشیدگی تیزی سے بڑھ رہی ہے اور آنے والے دنوں میں ترنمول کانگریس اور بی جے پی کے درمیان بیان بازی مزید تیز ہونے کا امکان ہے۔
