بنگال کے ہر گھر تک پہنچے گا صاف پینے کا پانی

‘ڈبل انجن ‘ حکومت کا شفافیت اور تیز رفتار ترقی کے ساتھ کام کرنے کا عزم

کولکاتہ: مغربی بنگال میں نئی بی جے پی حکومت نے اقتدار سنبھالنے کے بعد مرکزی منصوبوں کو تیزی سے نافذ کرنے کا عمل شروع کر دیا ہے۔ اسی سلسلے میں وزیر اعلیٰ شوبھندو ادھیکاری نے پیر کو مرکزی وزارتِ آبی وسائل کے ساتھ اہم میٹنگ کی، جہاں جل جیون مشن کے نفاذ کے لیے مرکز اور ریاست کے درمیان مفاہمت نامے (ایم او یو) پر دستخط کیے گئے۔ اس موقع پر چیف سکریٹری منوج کمار اگروال سمیت کئی اعلیٰ افسران بھی موجود تھے۔ میٹنگ کے دوران وزیر اعلیٰ نے سابق ترنمول حکومت پر سخت تنقید کرتے ہوئے الزام لگایا کہ مرکز کی جانب سے دی گئی رقم کو صحیح طریقے سے خرچ نہیں کیا گیا اور کئی منصوبے صرف کاغذوں تک محدود رہے۔ انہوں نے کہا کہ پچھلی حکومت نے جل جیون مشن کا نام بدل کر جلسوپن رکھا، لیکن زمینی سطح پر خاطر خواہ کام نہیں کیا گیا۔ شوبھندو ادھیکاری نے دعویٰ کیا کہ اب ڈبل انجن حکومت کے تحت ریاست کے ہر گھر تک صاف پینے کا پانی پہنچانے کے لیے تیزی سے کام کیا جائے گا اور مرکزی فنڈ کا مکمل استعمال یقینی بنایا جائے گا۔ وزیر اعلیٰ نے کہا کہ نئی حکومت شفافیت، جوابدہی اور تیز رفتار ترقی پر یقین رکھتی ہے اور عوام کو ہر مرکزی اسکیم کا براہ راست فائدہ پہنچایا جائے گا۔ دوسری طرف سیاسی حلقوں میں اس میٹنگ کو کافی اہم مانا جا رہا ہے، کیونکہ بنگال میں برسوں بعد مرکز اور ریاست کے درمیان اس سطح پر کسی بڑے منصوبے کے لیے مشترکہ معاہدہ ہوا ہے۔ بی جے پی قیادت کا کہنا ہے کہ جل جیون مشن کے ذریعے دیہی علاقوں میں پینے کے پانی کے بحران کو کم کیا جائے گا، جبکہ اپوزیشن اس معاملے پر حکومت کے دعوؤں پر سوال اٹھا رہی ہے۔ تاہم نئی حکومت نے واضح کر دیا ہے کہ ریاست میں ترقیاتی منصوبوں کے نفاذ میں کسی بھی قسم کی لاپروائی برداشت نہیں کی جائے گی اور تمام کاموں کی نگرانی براہ راست اعلیٰ سطح سے کی جائے گی۔