اقوام متحدہ، 27 نومبر (یو این آئی) اقوام متحدہ کے سکریٹری جنرل انتونیو گوٹیرس نے اسرائیل اور لبنان کے درمیان جنگ بندی کے اعلان کا خیر مقدم کیا ہے۔ان کے ترجمان نے منگل کو ایک بیان میں کہا کہ اقوام متحدہ کے سربراہ کو امید ہے کہ معاہدہ دونوں ممالک کے درمیان جاری تشدد، تباہی اور مصائب کا خاتمہ کر سکتا ہے۔مسٹر گوٹیریس نے فریقین پر زور دیا کہ وہ اس معاہدے کے تحت کیے گئے اپنے تمام وعدوں کا مکمل احترام اور تیزی سے عمل درآمد کریں اور سلامتی کونسل کی قرارداد 1701 (2006) کے مکمل نفاذ کے لیے فوری اقدامات کریں۔ بیان کے مطابق، لبنان کے لیے اقوام متحدہ کے خصوصی رابطہ کار اور یہاں اقوام متحدہ کی عبوری فورس (یواین آئی ایف آئی ایل) دونوں اپنے متعلقہ مینڈیٹ کے مطابق اس معاہدے کے نفاذ کی حمایت کے لیے تیار ہیں۔اقوام متحدہ کے سیکرٹری جنرل کا یہ بیان اسرائیلی وزیر اعظم بنجمن نیتن یاہو کے اعلان کے چند گھنٹے بعد سامنے آیا ہے کہ ملک کی سکیورٹی کابینہ نے حزب اللہ کے ساتھ جنگ بندی کے معاہدے کی منظوری دے دی ہے۔ توقع ہے کہ جنگ بندی بدھ کی صبح سے نافذ ہو جائے گی۔لبنان کے لیے اقوام متحدہ کے خصوصی کوآرڈینیٹر جینین ہینس پلاسچارٹ نے کہا کہ جنگ بندی کا معاہدہ بلیو لائن کے دونوں جانب شہریوں کی حفاظت اور سلامتی کو بحال کرنے کے لیے اہم ہے۔ انہوں نے کہا، ’’اب ٹھوس کارروائی کے ذریعے آج کی حصولیابی کو مضبوط کرنے کا وقت آگیا ہے۔
