ہائی کورٹ ای ڈی کی درخواست پر 7 دنوں میں غور کرے : سپریم کورٹ
جدید بھارت نیوز سروس
رانچی، 14 اکتوبر:۔ جھارکھنڈ کے آبی وسائل کے وزیر متھلیش ٹھاکر کے گھر پر انفورسمنٹ ڈائریکٹوریٹ (ای ڈی) کے چھاپے کے درمیان سپریم کورٹ نے مدھو کوڈا معاملے میں مرکزی تفتیشی ایجنسی کو ہدایت دی ہے۔ مدھو کوڈا جنہوں نے اپنے خلاف کیس پر روک لگانے کے لیے سپریم کورٹ سے رجوع کیا تھا، انہیں ہائی کورٹ سے رجوع کرنے کو کہا گیا ہے۔ منی لانڈرنگ کیس کی تحقیقات کرنے والی مرکزی ایجنسی ای ڈی نے 8 نومبر 2023 کے جھارکھنڈ ہائی کورٹ کے حکم کو سپریم کورٹ میں چیلنج کیا ہے۔ ہائی کورٹ نے منی لانڈرنگ ایکٹ (پی ایم ایل اے) کے تحت الزامات عائد کرنے کے خلاف مدھو کوڈا کی عرضی کو قبول کرتے ہوئے نچلی عدالت میں مزید کارروائی پر روک لگا دی تھی۔ سپریم کورٹ کی بنچ نے ای ڈی کے وکیل کو مشورہ دیا کہ انفورسمنٹ ڈائریکٹوریٹ کی عرضی کو عدالت عظمیٰ میں زیر التوا رکھا جائے۔ دریں اثنا، ایجنسی اس کیس پر روک اٹھانے کے لیے ہائی کورٹ سے رجوع کر سکتی ہے۔ ایس وی راجو نے اس سے اتفاق کیا اور ہائی کورٹ میں دائر کی جانے والی اپنی عرضی کو جلد نمٹانے کے لیے ہدایات دینے کی درخواست کی۔ بنچ نے ای ڈی کی عرضی کو 25 نومبر کو سماعت کے لیے درج کرنے کی ہدایت دی۔ سپریم کورٹ نے جھارکھنڈ ہائی کورٹ کو ہدایت دی کہ وہ ایجنسی کی درخواست دائر کرنے کے 7 دنوں کے اندر اس پر غور کرے۔ جج نے یہ بھی کہا کہ ایس وی راجو کو متعلقہ حقائق کو ہائی کورٹ کے نوٹس میں لانا چاہئے۔ اس دوران، ہم آپ کی درخواست کو یہاں زیر التواء رکھے ہوئے ہیں۔
