بھوپال: مدھیہ پردیش کے شاجاپور ضلع کے کلکٹر کشور کانیال کو ایک ڈرائیور کے ساتھ بدسلوکی سے پیش آنا مہنگی پڑ گیا ہے۔ رپورٹ کے مطابق وزیر اعلی موہن یادو نے اس رویے کو نامناسب قرار دیتے ہوئے کلکٹر کا تبادلہ کر دیا۔
کلکٹر شاجاپور گزشتہ رو بس-ٹرک ڈرائیوروں کی ہڑتال کے سلسلے میں ایک میٹنگ کر رہے تھے۔ اس دوران جب ایک ڈرائیور نے اپنے خیالات کا اظہار کیا تو کلکٹر کانیال غصے میں آ گئے اور مبینہ طور پر ڈرائیور سے کہا کہ تمہاری اوقات کیا ہے! یہ ویڈیو سوشل میڈیا پر وائرل ہو گئی۔
VIDEO | A verbal spat erupted between Shajapur (Madhya Pradesh) Collector Kishor Kumar Kanyal and one of the truckers, protesting against the new hit-and-run law, earlier today. pic.twitter.com/nv6bMvB3FJ
— Press Trust of India (@PTI_News) January 2, 2024
شاجاپور ضلع مجسٹریٹ کی منگل کو سوشل میڈیا پر وائرل ہونے والی ویڈیو میں وہ ایک میٹنگ کے دوران ایک ڈرائیور سے اس کی اوقات کے بارے میں پوچھتے ہوئے نظر آ رہے۔ تاہم اپنی غلطی کا احساس ہونے کے بعد ضلع مجسٹریٹ کشور کانیال نے اس پر افسوس کا اظہار کیا۔ شاجاپور کلکٹر کشور کنیال نے ڈرائیورز ایسوسی ایشن کی میٹنگ طلب کی تھی۔ اس دوران کلکٹر نے کہا، ’’میں صاف کہہ رہا ہوں کہ کوئی بھی قانون کو اپنے ہاتھ میں نہیں لے گا۔‘‘
اس پر ایک ڈرائیور نے کلکٹر سے کہا کہ اچھے سے بولو! اس پر کلکٹر نے غصے میں آ کر کہا غلط کیا ہے؟ سمجھ کیا رکھا ہے، کیا کرو گے تم، اوقات کیا ہے تمہاری؟ اس کے جواب میں ڈرائیور نے کہا کہ ’’یہی تو لڑائی ہے کہ ہماری کوئی اوقات نہیں۔‘‘‘ کلکٹر نے جواب دیا ’’لڑائی اس طرح نہیں ہوتی۔ برائے مہربانی کوئی قانون اپنے ہاتھ میں نہ لیں، میں نے آپ کے تمام خیالات سننے کے لیے یہاں بلایا ہے۔
#WATCH | Madhya Pradesh Chief Minister Dr Mohan Yadav says, “The language used during the district administration meeting in Shajapur, is not at all appropriate. No official can use this type of language. Our government will not tolerate this… I hope the new officials who will… pic.twitter.com/Y8rMwPShKQ
— ANI (@ANI) January 3, 2024
وزیر اعلیٰ نے کلکٹر کے رویے پر نہ صرف برہمی کا اظہار کیا بلکہ کارروائی کی ہدایات بھی دیں۔ کانیال کو شاجاپور کلکٹر کے عہدے سے ہٹا دیا گیا ہے اور ان کی جگہ نرسنگ پور کی کلکٹر ریتو بافنا کو تعینات کیا گیا ہے۔
وزیر اعلیٰ یادو نے کہا ’’یہ حکومت غریبوں کی حکومت ہے، سب کے کام کا احترام ہونا چاہیے اور جذبات کا بھی احترام ہونا چاہیے۔ وزیر اعظم نریندر مودی کی قیادت میں ہم غریبوں کی فلاح و بہبود کے لیے کام کر رہے ہیں۔ ہم غریبوں کی مسلسل خدمت کر رہے ہیں۔‘‘
وزیر اعلیٰ نے کہا ’’بحیثیت انسان ایسی زبان ہماری حکومت میں برداشت نہیں، میں خود ایک مزدور گھرانے کا بیٹا ہوں۔ ایسی زبان بولنا مناسب نہیں۔ ساتھ ہی تمام افسران کو پیغام دیتے ہوئے کہا کہ افسران اپنی زبان اور برتاؤ کا خیال رکھیں۔‘‘
