کوچ سے علیحدگی کے بعد رومانیہ میں شاندار آغاز
بخاریسٹ،3 فروری (یو این آئی ) انگلینڈ کی نمبر ون ٹینس اسٹار اور سابق یو ایس اوپن چیمپئن ایما ریڈوکانو نے آسٹریلین اوپن کی مایوسی اور اپنے کوچ سے علیحدگی کے بعد پہلی بڑی کامیابی حاصل کر لی ہے۔ رومانیہ کے شہر کلج ناپوک میں جاری ونرز اوپن ٹینس ٹورنامنٹ کے پہلے راؤنڈ میں انہوں نے بیلجیئم کی گریٹ منین کو شکست دے کر ایونٹ کا پراعتماد آغاز کیا ہے۔کلج ناپوک کے بی ٹی ایرینا میں کھیلے گئے اس مقابلے میں 23 سالہ ریڈوکانو مکمل طور پر چھائی رہیں اور ریڈوکانو نے گریٹ منین کو اسٹریٹ سیٹس میں 0-6 اور 4-6 سے مات دی۔ یہ یکطرفہ مقابلہ محض 70 منٹ تک جاری رہا۔ ٹورنامنٹ کی ٹاپ سیڈ ریڈوکانو نے میچ کے دوران تین ایسز لگائے اور حریف کھلاڑی کی سروس چار بار توڑ کر اپنی برتری ثابت کی۔ایما ریڈوکانو کے لیے یہ جیت نفسیاتی طور پر انتہائی اہم ہے کیونکہ گزشتہ ماہ وہ آسٹریلین اوپن کے دوسرے راؤنڈ میں اناستاسیا پوٹاپووا سے ہار کر باہر ہو گئی تھیں۔ اس شکست کے فوراً بعد انہوں نے اپنے ہسپانوی کوچ فرانسس روئگ سے راہیں جدا کر لی تھیں۔ وہ فی الحال کسی مستقل کوچ کے بغیر کھیل رہی ہیں اور اپنے کیریئر کو دوبارہ پٹری پر لانے کے لیے کوشاں ہیں۔پہلے راؤنڈ میں کامیابی کے بعد ایما ریڈوکانو اب دوسرے مرحلے کے لیے تیار ہیں۔ بدھ کو ان کا سامنا سلووینیا کی کایا جوان سے ہوگا۔
