حیدرآباد اور پنجاب کےدرمیان مقابلہ آج

ارشدیپ سنگھ سن رائزرز کے لیے خطرہ

حیدرآباد، 5 مئی (یو این آئی)آئی پی ایل 2026 کا 49 واں مقابلہ بدھ کو سن رائزرز حیدرآباد اور پنجاب کنگز کے درمیان کھیلا جائے گا۔ پوائنٹس ٹیبل پر اس وقت پنجاب کی ٹیم 13 پوائنٹس کے ساتھ سرفہرست ہے، جبکہ حیدرآباد 12 پوائنٹس کے ساتھ تیسرے نمبر پر براجمان ہے۔ اگرچہ ریکارڈ کے لحاظ سے حیدرآباد کا پلہ بھاری رہا ہے (25 میں سے 17 فتوحات)، لیکن حالیہ فارم پنجاب کے حق میں نظر آتی ہے۔اس میچ کو “سکس ہٹرز کی جنگ” قرار دیا جا رہا ہے۔ حیدرآباد کی جانب سے ابھیشیک شرما (32 چھکے)، ہینرک کلاسن (19) اور ایشان کشن (18) فارم میں ہیں۔ دوسری طرف، پنجاب کے پاس بھی بڑی ہٹ لگانے والے بلے بازوں کی فوج ہے، جن میں پرینش آریہ (26 چھکے)، پربھسمرن سنگھ (47 چھکے، 2025 سے اب تک) اور شریاس ایئر (22 چھکے) شامل ہیں۔اعداد و شمار بتاتے ہیں کہ پنجاب کے تیز گیند باز ارشدیپ سنگھ حیدرآباد کے خطرناک بلے بازوں پر حاوی رہے ہیں۔ٹریوس ہیڈ کوارشدیپ نے 3 بار آؤٹ کیا ہے۔ایشان کشن ارشدیپ کے خلاف 7 اننگز میں 4 بار اپنی وکٹ گنوا چکے ہیں۔جنوبی افریقی اسٹار کلاسن ارشدیپ کے خلاف مکمل بے بس نظر آئے ہیں، جہاں وہ 7 اننگز میں 3 بار آؤٹ ہوئے اور ان کا اسٹرائیک ریٹ محض 104 رہا ہے۔تجزیہ کاروں کے مطابق، میچ کا فیصلہ پہلے 6 اوورز (پاور پلے) میں ہو سکتا ہے۔ ہیڈ اور ابھیشیک کی جوڑی اس سیزن میں 10 اننگز میں 573 رنز جوڑ چکی ہے اور 6 بار پاور پلے میں 70 سے زائد رنز کی شراکت داری کی ہے۔ وہیں پنجاب کے پرینش آریہ 257 کے اسٹرائیک ریٹ سے پاور پلے میں رنز بنا رہے ہیں۔اس میچ میں دو کھلاڑیوں کی نظریں اہم سنگ میل پر ہوں گی۔ہینرک کلاسن کو آئی پی ایل میں 2000 رنز مکمل کرنے کے لیے 95 رنز درکار ہیں۔شریاس ایئر کا 250 واں ٹی 20 میچ ہوگا۔ اگر وہ 68 رنز بنا لیتے ہیں تو پنجاب کے لیے ان کے 1000 آئی پی ایل رنز مکمل ہو جائیں گے۔