جامتاڑا کی بیٹی دیواشی نے تھائی لینڈ میں جیتا گولڈ میڈل

جدید بھارت نیوز سروس
جامتاڑا، 10 مئی:۔ جامتاڑا ضلع کے کنڈہت بلاک کی باصلاحیت نشانہ باز دیواشی ہیمبرم نے بین الاقوامی سطح پر شاندار کارکردگی کا مظاہرہ کرتے ہوئے تھائی لینڈ میں منعقدہ انٹرنیشنل رائفل شوٹنگ ایئر گن مقابلے میں سونے کا تمغہ حاصل کیا ہے۔ جامتاڑا ضلع اولمپک ایسوسی ایشن کے سینئر نائب صدر دیپک دوبے نے بتایا کہ 4 سے 7 مئی تک جاری رہنے والے اس مقابلے میں 14 رکنی بھارتی ٹیم نے حصہ لیا تھا، جس میں دیواشی کی بہترین کارکردگی کی بدولت ملک کو گولڈ میڈل ملا۔ واضح رہے کہ دیواشی نے رواں سال جنوری میں گوا میں منعقدہ نیشنل رائفل شوٹنگ مقابلے میں بھی سونے کا تمغہ جیتا تھا، جس کی بنیاد پر ان کا انتخاب بھارتی ٹیم میں ہوا تھا۔ دیواشی کی اس تاریخی کامیابی پر پورے ضلع میں خوشی کی لہر دوڑ گئی ہے اور اسے علاقے کی بیٹیوں کے لیے باعث تحریک قرار دیا جا رہا ہے۔ اطلاع کے مطابق دیواشی ہیمبرم اتوار کی شام جامتاڑا پہنچیں گی، جہاں مقامی کھیل تنظیموں اور سماجی اداروں کی جانب سے ان کا شاندار استقبال کیا جائے گا۔