آئی پی ایل 2026: دہلی کی پلے آف تک رسائی کی آخری امید

کل ہوم گراؤنڈ پر کے کے آر سے ٹکرائے گی

نئی دہلی،7 مئی (یواین آئی ) آئی پی ایل 2026 کے سنسنی خیز مرحلے میں جمعہ کے روز دہلی کیپیٹلز (ڈی سی ) اپنے ہوم گراؤنڈ پر کولکتہ نائٹ رائیڈرز (کے کے آر) کے مدمقابل ہوگی۔ دہلی کے لیے یہ میچ محض ایک مقابلہ نہیں بلکہ ٹورنامنٹ میں بقا کی آخری امید ہے، کیونکہ پلے آف کی دوڑ میں شامل رہنے کے لیے اسے اپنے بقیہ تمام چاروں میچز جیتنا لازمی ہیں۔اب تک دونوں ٹیموں کے درمیان کھیلے گئے 34 میچوں میں کولکتہ کا پلڑا بھاری رہا ہے، جس نے 19 فتوحات سمیٹ رکھی ہیں جبکہ دہلی 15 میچز جیت سکی ہے۔ دہلی کے اپنے میدان پر بھی کولکتہ کو 6-5 کی معمولی برتری حاصل ہے۔ تشویشناک بات یہ ہے کہ 2024 کے بعد سے دہلی کی ٹیم کولکتہ کو ایک بھی میچ میں شکست نہیں دے پائی ہے۔دہلی کی بیٹنگ کا پورا دارومدار کپتان کے ایل راہل پر ہے۔ راہل اس سیزن میں شاندار فارم میں ہیں اور 10 اننگز میں 445 رنز بنا چکے ہیں۔ ان کا اوسط 49.4، اوراسٹرائیک ریٹ: 181 ہے۔ساتویں سے 16ویں اوور کے درمیان راہل کا اسٹرائیک ریٹ 211 تک جا پہنچتا ہے، جو انہیں اس مرحلے کا دوسرا خطرناک ترین بلے باز بناتا ہے۔تاہم، دہلی کے لیے پریشانی کی بات یہ ہے کہ ٹیم کے مجموعی رنز کا 26 فیصد حصہ اکیلے راہل کا ہے اور دیگر بلے باز مسلسل ناکامی کا شکار ہیں۔کولکتہ کی حالیہ کامیابیوں کے پیچھے اسپنر ورون چکرورتی کا کلیدی کردار ہے۔ ابتدائی میچوں میں آؤٹ آف فارم رہنے کے بعد ورون نے آخری چار اننگز میں 10 وکٹیں حاصل کی ہیں۔ وہ ڈیوڈ ملر کو چار اور ٹرسٹن اسٹبس کو دو بار آؤٹ کر کے دہلی کے مڈل آرڈر کے لیے ڈراؤنا خواب ثابت ہو چکے ہیں۔دہلی کے اسٹار اسپنر کلدیپ یادو کے لیے یہ سیزن اب تک مایوس کن رہا ہے۔ ٹی 20 ورلڈ کپ میں زیادہ تر بینچ پر بیٹھنے کی وجہ سے وہ اپنی تال کھو بیٹھے ہیں اور اس سیزن میں ان کی اکانومی 10.40 رہی ہے، جو ان کے آئی پی ایل کیریئر کا بدترین ریکارڈ ہے۔ تاہم، اپنی سابقہ ٹیم (کے کے آر) کے خلاف ان کا ریکارڈ بہترین ہے، جس سے دہلی کو فارم میں واپسی کی امید ہے۔نیوزی لینڈ کے فن ایلن ورلڈ کپ کے فارم کو آئی پی ایل میں دہرانے میں ناکام رہے ہیں۔ اب تک وہ کسی بھی میچ میں 40 رنز کا ہندسہ عبور نہیں کر سکے، جس کی وجہ سے انہیں ڈراپ بھی کیا گیا۔ اگر وہ اس میچ میں کھیلتے ہیں تو ان کا سامنا اکشر پٹیل سے ہوگا جو انہیں ماضی میں دو بار آؤٹ کر چکے ہیں۔کیا دہلی کیپیٹلز ہوم گراؤنڈ پر کولکتہ کی فتوحات کا سلسلہ روک کر پلے آف کی امیدیں زندہ رکھ پائے گی؟ اس کا فیصلہ کل میدانِ جنگ میں ہوگا۔