ناروے شطرنج 2026 میں ہندوستانی کھلاڑیوں کا شاندار آغاز

پرگیانند، گوکیش اور دیویا نے آرماگیڈن میں جیت درج کی

اوسلو، 26 مئی (ہ س)۔ ناروے شطرنج 2026 کا آغاز سنسنی خیز مقابلوں کے ساتھ ہوا، جہاں پہلے ہی راونڈ میں کلاسیکل اور آرماگیڈن دونوں فارمیٹس میں زبردست مقابلہ دیکھنے کو ملا۔ ہندوستانی کھلاڑیوں نے بھی شاندار کارکردگی کا مظاہرہ کرتے ہوئے مضبوط شروعات کی۔ پیر کے روز شروع ہوئے اس ٹورنامنٹ میں دن کا سب سے بڑا الٹ پھیر تب ہوا جب فرانس کے علی رضا فیروزجا نے ورلڈ نمبر 1 میگنس کارلسن کو کلاسیکل مقابلے میں شکست دیا۔ مقابلے کے بیشتر وقت کارلسن مضبوط پوزیشن میں نظر آ رہے تھے، لیکن وقت کے دباو میں ان سے بڑی غلطی ہو گئی، جس کا فائدہ اٹھاتے ہوئے فیروزجا نے جیت درج کر لی۔ اس جیت کے ساتھ فرانسیسی گرینڈ ماسٹر نے ٹورنامنٹ میں برتری حاصل کر لی ہے۔ہندوستانی گرینڈ ماسٹر آر پرگیانند اور ویسلی سو کے درمیان کلاسیکل مقابلہ ڈرا رہا۔ اس کے بعد کھیلے گئے آرماگیڈن مقابلے میں پرگیانند نے جارحانہ کھیل دکھاتے ہوئے جیت حاصل کی اور اضافی پوائنٹ اپنے نام کیے۔ عالمی چیمپئن ڈی گکیش کا سامنا جرمنی کے ٹاپ کھلاڑی ونسنٹ کیمر سے ہوا۔ اینڈ گیم میں کیمر مضبوط پوزیشن میں پہنچ گئے تھے اور جیت کے قریب نظر آرہے تھے، لیکن گکیش نے شاندار دفاع کرتے ہوئے مقابلہ ڈرا کرایا۔ اس کے بعد آرماگیڈن ٹائی بریکر میں گکیش نے واپسی کرتے ہوئے جیت درج کی اور اہم اضافی پوائنٹس حاصل کئے۔پہلے راونڈ کے بعد علی رضا فیروزجا کلاسیکل جیت کی بدولت پوائنٹس ٹیبل میں سرفہرست پہنچ گئے ہیں۔ ناروے شطرنج خواتین ٹورنامنٹ میں بھی پہلے دن سنسنی خیز مقابلے دیکھنے کو ملے۔ قازقستان کی بیبیسارا اساوبایوا نے ہندوستان کی نمبر 1 کھلاڑی کونیرو ہمپی کو کلاسیکل مقابلے میں ہرا کر بڑا الٹ پھیر کیا۔ انہوں نے مڈل گیم میں ملے مواقع کا شاندار فائدہ اٹھاتے ہوئے درست کھیل سے جیت درج کی۔انا مزیچک اور ژو جنر کے درمیان کلاسیکل مقابلہ ڈرا رہا، جبکہ آرماگیڈن میں ژو جنر نے جیت حاصل کی۔ وہیں موجودہ خواتین عالمی چیمپئن جو وینجون اور ہندوستان کی دیویا دیشمکھ کے درمیان کلاسیکل مقابلہ برابری پر ختم ہوا۔ جو وینجون جیت کے لیے مسلسل دباو بنا رہی تھیں، لیکن دیویا نے شاندار صبر و ضبط کا مظاہرہ کیا۔ اس کے بعد آرماگیڈن مقابلے میں دیویا نے بہترین کھیل کا مظاہرہ کرتے ہوئے جیت درج کی۔ پہلے راونڈ کے بعد خواتین کے زمرے میں بیبیسارا اساوبایوا سرفہرست ہیں۔ناروے شطرنج 2026 کا انعقاد 25 مئی سے 5 جون تک اوسلو میں کیا جا رہا ہے۔ ٹورنامنٹ میں مردوں اور خواتین کے زمرے کے دو سپر ٹورنامنٹ متوازی طور پر کھیلے جا رہے ہیں۔ دونوں ٹورنامنٹس میں چھ چھ کھلاڑی ڈبل راونڈ رابن فارمیٹ میں حصہ لے رہے ہیں اور دونوں کے لیے یکساں انعامی رقم رکھی گئی ہے۔اس ٹورنامنٹ کی خاص بات اس کا انوکھا فارمیٹ ہے۔ اگر کلاسیکل مقابلہ ڈرا رہتا ہے تو فاتح کا فیصلہ کرنے کے لیے آرماگیڈن مقابلہ کھیلا جاتا ہے، جس سے ہر راونڈ میں حتمی نتیجہ یقینی ہوتا ہے۔