119views
حزب اختلاف نے لوک سبھا اسپیکر کو لکھا خط، جمہوری اقدار کی خلاف ورزی قرار دیا
نئی دہلی، 19 دسمبر:۔ (ایجنسی) انڈیا بلاک کے رہنماؤں نے پارلیمنٹ کمپلیکس میں پیش آنے والے دھکا مکی کے واقعے پر لوک سبھا اسپیکر اوم برلا کو خط لکھا ہے۔ خط میں اس واقعے پر گہری تشویش کا اظہار کیا گیا ہے۔ خط میں کہا گیا ہے کہ انڈیا بلاک کے ارکان پارلیمنٹ پرامن احتجاج کر رہے تھے اور ڈاکٹر بی آر امبیڈکر کے مجسمے سے ’مکر دوار‘ تک مارچ کر رہے تھے۔ تاہم، جب انہوں نے پارلیمنٹ میں داخل ہونے کی کوشش کی تو انہیں روکا گیا۔ خط میں مزید کہا گیا ہے کہ اپوزیشن لیڈر راہل گاندھی پر حکمران جماعت کے تین ارکان پارلیمنٹ نے حملہ کیا، جو ان کے حقوق کی سنگین خلاف ورزی ہے۔ راہل گاندھی نے الزام لگایا کہ بی جے پی کے ارکان پارلیمنٹ نے ان کے ساتھ دھکا مکی اور دھمکیاں دی ہیں۔ انہوں نے کہا کہ انہیں پارلیمنٹ میں داخل ہونے سے روکنے کی کوشش کی گئی، جو آئینی حقوق پر حملہ ہے۔ بی جے پی کے ایم پی پرتاپ سارنگی نے دعویٰ کیا کہ وہ سیڑھیوں پر کھڑے تھے جب راہل گاندھی کے دھکا دینے سے ایک رکن ان پر گر پڑا، جس سے وہ زخمی ہوگئے۔ اس واقعے کے بعد وزیراعظم نریندر مودی نے اسپتال جا کر زخمی ایم پی پرتاپ سارنگی اور مکیش راجپوت کی عیادت کی۔ٹی ڈی پی کے ایم پی بیاریڈی شبری اور بی جے پی کی ایم پی بانسری سوراج نے راہل گاندھی کے خلاف ایف آئی آر درج کرنے کا مطالبہ کیا ہے۔ اس تنازعے پر کانگریس نے اسے جمہوری اقدار پر حملہ قرار دیا ہے اور لوک سبھا اسپیکر سے کارروائی کا مطالبہ کیا ہے۔
