ویسٹ انڈیز کے خلاف ہوم سیریز میں نہیں ہوئے منتخب
نئی دہلی ،12جنوری (ہ س )۔پاکستان کے مایہ ناز فاسٹ باؤلر شاہین شاہ آفریدی کو ویسٹ انڈیز کے خلاف ہوم گراؤنڈ پر دو ٹیسٹ میچوں کی سیریز کے لیے ٹیم میں منتخب نہ کیے جانے سے ٹیسٹ کرکٹ میں ان کا مستقبل خطرے میں پڑ گیا ہے۔ شاہین کو 2024 میں شروع ہونے والے پاکستان کے آخری 12 ٹیسٹ میچوں میں سے آٹھ سے یا تو باہر کر دیا گیا تھا یا مبینہ طور پر آرام دیا گیا تھا۔ اس لیفٹ آرم فاسٹ بولر نے اب تک 32 ٹیسٹ میں 116 وکٹیں حاصل کی ہیں۔ انہیں جنوبی افریقہ کے خلاف ان کی سرزمین پر کھیلی جانے والی دو ٹیسٹ میچوں کی سیریز کے لیے بھی ٹیم میں منتخب نہیں کیا گیا تھا۔ اس کے بعد سلیکٹرز نے واضح کیا تھا کہ وہ انہیں 19 فروری سے شروع ہونے والی آئی سی سی چمپئنس ٹرافی کے لیے تازہ دم چاہتے ہیں۔دلچسپ بات یہ ہے کہ پاکستان کرکٹ بورڈ نے شاہین کو جاری بنگلہ دیش پریمیئر لیگ میں کھیلنے کیلئے نو آبجیکشن سرٹیفکیٹ (این او سی) جاری کرنے میں کوئی ہچکچاہٹ محسوس نہیں کی جبکہ وہیں جنوبی افریقہ میں ٹیسٹ سیریز جاری تھی۔ سلیکٹرز نے فاسٹ باؤلرز نسیم شاہ، میر حمزہ، محمد عباس اور عامر جمال کو بھی ویسٹ انڈیز کے خلاف دو ٹیسٹ میچوں کیلئے ٹیم میں شامل نہیں کیا جب کہ وہ جنوبی افریقہ میں کھیلی گئی سیریز میں ٹیم کا حصہ تھے۔ پاکستان اس سیریز کے دونوں میچ ہار چکا ہے۔ سلیکٹرز کے قریبی ذرائع نے بتایا کہ شاہین اور نسیم دونوں کو چمپئنس ٹرافی کے لیے تیار کیا جا رہا ہے۔ ذرائع نے کہا، “سلیکٹرز چاہتے ہیں کہ شاہین اور یہاں تک کہ نسیم بھی چمپئنس ٹرافی میں اپنا بہترین مظاہرہ کریں کیونکہ یہ 50 اوور کا مقابلہ ہے اور ہم دفاعی چمپئن ہیں۔
“ویسٹ انڈیز کے خلاف دو ٹیسٹ میچوں کی سیریز کے لیے پاکستان کا سکواڈ درج ذیل ہے:
شان مسعود (کپتان)، سعود شکیل (نائب کپتان)، بابر اعظم، محمد رضوان، امام الحق، کامران غلام، محمد ہریرہ، روحیل نذیر، نعمان علی، ساجد خان، ابرار احمد، سلمان علی آغا، محمد علی، خرم شہزاد اور کاشف علی۔
