اسلام آباد، 14 اکتوبر (یواین آئی) پاکستان کرکٹ ٹیم نے انگلینڈ کے خلاف دوسرے ٹیسٹ کے لیے اپنی پلیئنگ الیون کا اعلان کردیا جس میں 3خصوصی اسپنروں کو شامل کیا گیا ہے اور عامر جمال بطور آل راؤنڈر 11 رکنی ٹیم کا حصہ ہیں۔پاکستان اور انگلینڈ کے درمیان 3 ٹیسٹ میچز پر مشتمل سیریز کا دوسرا میچ بھی ملتان میں کھیلا جارہا ہے اور حیران کن طور پر میچ اسی پچ پر ہی کھیلا جائے گا جس پر ٹیم کو پہلے ٹیسٹ میں بدترین شکست کا سامنا کرنا پڑا تھا۔پہلے میچ کی زبردست شکست کے بعد پاکستان کی ٹیم کی نومنتخب سلیکشن کمیٹی نے ٹیم میں تبدیلی کرتے ہوئے بابراعظم، شاہین شاہ آفریدی، نسیم شاہ، ابرار احمد، سرفراز احمد کو ڈراپ کیا اور 6 نئے کھلاڑیوں کو شامل کیا۔ٹیم میں شامل 6 نئے کھلاڑیوں میں 4 اسپیشلسٹ اسپنر اور دو بلے باز تھے، دوسرے ٹیسٹ کے لیے 3 اسپنرز اور ایک بلے باز کامران غلام کو پلیئنگ الیون میں شامل کیا گیا۔پاکستان کی ٹیم نے انگلینڈ کے خلاف دوسرے ٹیسٹ کے لیے ٹیم میں 4 تبدیلیاں کیں، بابراعظم کی جگہ کامران غلام کو موقع دیا گیا ہے اور وہ اسی پوزیشن پر بیٹنگ کریں گے جس پر بابراعظم کرتے ہیں۔اس کے علاوہ ٹیم میں 3 اسپنرز، زاہد محمود، ساجد خان اور نعمان علی کو شامل کیا گیا ہے تاہم خراب کارکردگی کے باوجود صائم ایوب کو ٹیم میں برقرار رکھا گیا ہے۔شان مسعود (کپتان)، سعود شکیل (نائب کپتان)، صائم ایوب، عبداللہ شفیق، کامران غلام، محمد رضوان، سلمان علی آغا، عامر جمال، نعمان علی، ساجد خان، زاہد محمود۔
