راہل گاندھی کا ایل ڈی ایف اور مودی پر حملہ، نظریاتی انحراف کا الزام

الاپوزا، 4 اپریل (یو این آئی) کانگریس لیڈر راہل گاندھی نے ہفتہ کے روز کیرالہ میں برسراقتدار لیفٹ ڈیموکریٹک فرنٹ (ایل ڈی ایف) اور وزیر اعظم نریندر مودی پر شدید حملہ کرتے ہوئے ان پر تکبر، سیاسی مفاد پرستی اور منتخب خاموشی کا الزام لگایا۔ایک انتخابی ریلی سے خطاب کرتے ہوئے راہل گاندھی نے سوال کیا کہ مودی نے کبھی عوامی طور پر کیرالہ کے وزیر اعلیٰ پنارائی وجین یا ان کے خاندان کو نشانہ کیوں نہیں بنایا، جبکہ وہ اکثر ان (راہل) اور کانگریس پر حملے کرتے رہتے ہیں۔ انہوں نے الزام لگایا کہ یہ “خاموشی” بی جے پی اور ایل ڈی ایف کے کچھ حصوں کے درمیان ایک درپردہ مفاہمت کی نشاندہی کرتی ہے۔انہوں نے دعویٰ کیا کہ ایل ڈی ایف اپنا نظریاتی کردار کھو چکا ہے اور اسے اب حقیقی بائیں بازو کی تحریک نہیں کہا جا سکتا۔ ان کے بقول، اس فرنٹ میں اب دو طرح کے لیڈر ہیں، ایک وہ جو آر ایس ایس اور بی جے پی کے ساتھ اتحاد کرنے کے لیے تیار ہیں اور دوسرے وہ جو اب بھی بائیں بازو کے نظریے پر یقین رکھتے ہیں لیکن انہیں پارٹی میں سائیڈ لائن کر دیا گیا ہے۔اسٹیج پر سی پی آئی (ایم) کے سینئر لیڈر جی سدھاکرن کی موجودگی میں راہل گاندھی نے کہا کہ ایسے نظریاتی طور پر پابند رہنماؤں کو ان کی اپنی ہی صفوں میں “دھوکہ” دیا گیا ہے۔ اپنی تنقید کو وسعت دیتے ہوئے انہوں نے مودی پر کیرالہ کے حساس مسائل، خاص طور پر سبری مالا سونے کے مبینہ تنازعہ سے جان بوجھ کر بچنے کا الزام لگایا۔ انہوں نے کہا کہ وزیر اعظم دیگر مقامات پر مندروں کے بارے میں کثرت سے بات کرتے ہیں، لیکن سبری مالا میں سونے کو تانبے سے بدلنے کے الزامات پر خاموش رہتے ہیں۔ انہوں نے الزام لگایا کہ “یہ خاموشی وزیر اعلیٰ اور ایل ڈی ایف کے تحفظ کے لیے ہے۔”انہوں نے اپنے خلاف متعدد کیسز، پارلیمنٹ سے نااہلی اور سرکاری رہائش گاہ سے بے دخلی کا ذکر کرتے ہوئے سوال کیا کہ کیرالہ کے وزیر اعلیٰ وزیر اعظم کی ایسی تنقید سے کیوں بچے ہوئے ہیں۔راہل گاندھی نے مودی اور پنارائی وجین دونوں پر “اقتدار کے نشے میں دھت” ہونے کا الزام لگایا اور کہا کہ وہ ایسا برتاؤ کر رہے ہیں جیسے وہ عوام سے بالاتر ہوں۔ انہوں نے الزام لگایا کہ کیرالہ میں سیاہ جھنڈے دکھانے والے مظاہرین پر تشدد کیا جاتا ہے کیونکہ وہاں اختلاف رائے کو جمہوری اظہار کے بجائے خطرہ سمجھا جاتا ہے۔کانگریس لیڈر نے ریاست میں حکمرانی کے مسائل، زرعی بحران، منشیات کے بڑھتے ہوئے استعمال اور عیسائیوں سمیت اقلیتوں پر حملوں کے بارے میں بھی تشویش کا اظہار کیا۔ انہوں نے بین الاقوامی معاملات اور عالمی قیادت کے حوالے سے بھی مودی کی پالیسیوں پر تنقید کی۔