راہل گاندھی نے جنوبی امریکہ کے دورے کے دوران تعلیم اور اختراعات پر زور دیا

نئی دہلی، 12 اکتوبر (یو این آئی) لوک سبھا میں اپوزیشن لیڈر راہل گاندھی نے جنوبی امریکہ کے اپنے حالیہ دورے کے دوران ملک کے مستقبل کی تشکیل میں تعلیم کی انقلاب آفریں طاقت پر زور دیا پیرو اور چلی میں طلبہ وطالبات، فنکاروں اور سیاسی رہنماؤں کے ساتھ بات چیت میں مسٹر راہل گاندھی نے تعلیم کے لیے ایسا وژن پیش کیا جو جامع، اعلیٰ معیار اور تنقیدی سوچ پر مبنی ہو راہل گاندھی نے کہا کہ ‘میں ہمیشہ سے مانتا رہا ہوں کہ تعلیم آزادی کی بنیاد ہے؛ یہ چند لوگوں کا مخصوص استحقاق نہیں ہو سکتی ہے۔۔ انہوں نے مزید کہا کہ “ہندوستان کو ایسی تعلیم کی ضرورت ہے جو سائنسی مزاج کو پروان چڑھائے، تنقیدی سوچ کی حوصلہ افزائی کرے، اور ہمارے عوام کے بھرپور تنوع کو قبول کرے۔”راہل گاندھی کے سفارتی مشن کا مقصد جنوبی امریکی ممالک کے ساتھ ہندوستان کے سیاسی، تجارتی اور ثقافتی تعلقات کو مضبوط بنانا تھا۔ اپنے دورے کے دوران انہوں نے کولمبیا کی سینیٹ کے صدر سے ملاقات کی اور قریبی تعاون کو فروغ دینے کے لیے پیرو کے ساتھ پارلیمانی دوستانہ گروپ کا افتتاح کیا۔ ان کے دورے کو اجاگر کرتے ہوئے، انڈین اوورسیز کانگریس نے سوشل میڈیا پلیٹ فارم ایکس پر پوسٹ میں کہا کہ: “کولمبیا کے کمیوناس اور یونیورسٹی آف میڈیلن کے کلاس روم سے لے کر لیما میں طلبہ وطالبات کے ساتھ سازگار مکالمے تک، یہ سفر گرمجوشی، خوشی، اور تحریک آفریں خیالات کا ایک مجموعہ رہا ہے۔”بیرون ملک ہندوستانی صنعت کے کردار کو اجاگر کرتے ہوئے، راہل گاندھی نے جنوبی امریکہ میں بجاج، ہیرو، اور ٹی وی ایس کی کامیابی کی ستائش کی ہے۔ انہوں نے کہا کہ “بجاج، ہیرو اور ٹی وی ایس کو کولمبیا میں پھلتے پھولتے دیکھ کر فخر ہورہا ہے۔ اس سے یہ ثابت ہوتا ہے کہ ہندوستانی کمپنیاں اختراع کے ذریعے جیت درج کر سکتی ہیں، نہ کہ دوست نوازی سے۔ بہت شاندار حصولیابی۔”اس طرح انہوں نے اپنے تبصروں میں ترقی کے انجن کے طور پر منصفانہ مسابقت اور اختراع کی اہمیت پر زور دیا۔اپنے پورے دورے کے دوران، راہل گاندھی نے لیڈروں کی نئی نسل تیار کرنے کا وژن پیش کرتے ہوئے جمہوری اقدار اور قابل رسائی تعلیم کی اہم ضرورت پر زور دیا، جو نوجوانوں کے لیے معنویت کا حامل ہے۔