نیپال کے وزیر اعظم بالن شاہ نے بھارت کے دورے کی دعوت قبول کر لی

نئی دہلی۔ 12؍ اپریل۔ ایم این این۔نیپال کے وزیر خارجہ ششیر کھنال نے تصدیق کی ہے کہ وزیر اعظم بالن شاہ نے بھارتی وزیر اعظم نریندر مودی کی جانب سے بھارت کے دورے کی دعوت قبول کر لی ہے۔ رپورٹس کے مطابق یہ دعوت حالیہ سیاسی تبدیلیوں کے بعد دی گئی تھی، جسے دونوں ممالک کے درمیان تعلقات کو مزید مضبوط بنانے کی مثبت پیش رفت قرار دیا جا رہا ہے۔ وزیر خارجہ کھنال کے مطابق، بالن شاہ نے اصولی طور پر دورے پر آمادگی ظاہر کر دی ہے، تاہم اس کے حتمی شیڈول اور تاریخ کا تعین ابھی سفارتی سطح پر کیا جانا باقی ہے۔ دلچسپ امر یہ ہے کہ جہاں وزیر خارجہ نے دورے کی تصدیق کی، وہیں وزیر اعظم کے دفتر کی جانب سے اس حوالے سے لاعلمی کا اظہار بھی سامنے آیا، جس سے حکومتی سطح پر کچھ ابہام پیدا ہو گیا ہے۔ یہ ممکنہ دورہ نیپال میں نئی حکومت کے قیام کے بعد اہم سفارتی پیش رفت کے طور پر دیکھا جا رہا ہے۔