ہندوستان اور جنوبی کوریا نے خصوصی اسٹریٹجک شراکت داری کو اور مضبوط کرنے کے عزم کا اعادہ کیا

نئی دہلی 26 جون (یو این آئی) ہندوستان اور جنوبی کوریا نے دو طرفہ تعلقات میں نئی توانائی کا خیرمقدم کرتے ہوئے خصوصی اسٹریٹجک شراکت داری کو مزید مضبوط کرنے کے عزم کا اعادہ کیا ہے۔دونوں ممالک نے دو طرفہ تعاون کا دائرہ بڑھانے پر بھی اتفاق کیا ہے۔ وزیر خارجہ ایس جے شنکر جنوبی کوریا کے وزیر خارجہ چو ہیون کی دعوت پر 24 سے 25 جون تک کوریا کے سرکاری دورے پر تھے۔وزیر خارجہ نے سیول میں اپنے ہم منصب چو ہیون کے ساتھ دو طرفہ بات چیت کی۔ ان مذاکرات سے دو طرفہ تعلقات کے تمام پہلوؤں کا جائزہ لینے اور باہمی دلچسپی کے علاقائی اور عالمی امور پر تبادلہ خیال کرنے کا موقع ملا۔ دونوں وزراء نے اسی سال اپریل میں کوریا کے صدر لی جے میونگ کے ہندوستان کے سرکاری دورے کے نتائج کو آگے بڑھاتے ہوئے اہم شعبوں میں پیش رفت کا جائزہ لیا۔ ان شعبوں میں سیاسی تبادلے، تجارت اور سرمایہ کاری، مالیاتی تعاون، جہاز سازی، دفاع اور سلامتی، ابھرتی ہوئی ٹیکنالوجیز، اسٹارٹ اپس، ثقافت، تعلیم اور عوام کے درمیان باہمی رابطے شامل ہیں۔انہوں نے کثیر جہتی فورمز پر تعاون پر بھی تبادلہ خیال کیا اور آنے والے برسوں میں دو طرفہ تعاون کو مزید گہرا کرنے کے طریقوں کی نشان دہی کی۔انہوں نے دو طرفہ تعلقات میں نئی رفتار کا خیرمقدم کیا اور حالیہ اعلیٰ سطحی بات چیت کے نتائج کو آگے بڑھانے اور ہندوستان-جنوبی کوریا خصوصی اسٹریٹجک شراکت داری کو مزید مضبوط کرنے کے لیے مسلسل رابطے میں رہنے پر اتفاق کیا۔دورے کے دوران وزیر خارجہ نے جنوبی کوریا کے قومی سلامتی کے ڈائریکٹر وائی سونگ لیک سے بھی ملاقات کی اور علاقائی و عالمی پیش رفت پر اپنے تجزیات کا اشتراک کیا۔جمعہ کو وزیر خارجہ نے جیجو میں ‘امن اور خوشحالی کے لیے جیجو فورم کے افتتاحی سیشن میں کلیدی خطبہ دیا۔ مسٹر جے شنکر نے وزیر خارجہ چو ہیون کو دونوں فریقوں کی سہولت کے مطابق کسی تاریخ پر ہندوستان-جنوبی کوریا مشترکہ کمیشن کے اگلے اجلاس کے لیے ہندوستان آنے کی دعوت دی۔