گھر خالی کرواتے وقت مرکز قانونی طریقہ کار پر عمل کرے: ہائی کورٹ
نئی دہلی، 4 جنوری :۔ دہلی ہائی کورٹ نے مرکزی حکومت کو ہدایت دی کہ وہ ترنمول کانگریس لیڈر مہوا موئترا کو اپنی سرکاری رہائش گاہ خالی کرنے کے لیے قانونی عمل کی پیروی کرے۔ جب جسٹس سبرامنیم پرساد کی بنچ نے سرکاری بنگلہ خالی کرنے کے نوٹس پر روک لگانے سے انکار کر دیا۔ اس کے بعد مہوا موئترا کی طرف سے پیش ہوئے وکیل پنکی مشرا نے ہائی کورٹ سے درخواست واپس لے لی۔مہوا نے اپنی عرضی میں سینٹرل اسٹیٹ ڈائریکٹوریٹ کے حکم کو چیلنج کیا تھا۔ اسٹیٹ ڈائریکٹوریٹ نے مہوا کو 7 جنوری تک اپنا سرکاری بنگلہ خالی کرنے کا حکم دیا ہے۔ مہوا نے مطالبہ کیا تھا کہ 2024 کے لوک سبھا انتخابات کے نتائج آنے تک انہیں اپنے سرکاری بنگلے میں رہنے دیا جائے۔ ہائی کورٹ سے درخواست واپس لینے کے بعد مہوا کے وکیل نے کہا کہ وہ سینٹرل اسٹیٹ ڈائریکٹوریٹ سے رابطہ کریں گے اور 2024 کے لوک سبھا انتخابات تک بنگلہ خالی نہ کرنے کی درخواست کریں گے۔مہوا نے پارلیمنٹ سے اپنے اخراج کو سپریم کورٹ میں چیلنج کیا ہے۔ اس عرضی پر سماعت کرتے ہوئے سپریم کورٹ نے لوک سبھا سکریٹریٹ کو نوٹس جاری کیا ہے۔ 8 دسمبر کو لوک سبھا نے مہوا کی لوک سبھا کی رکنیت ختم کر دی۔ پارلیمنٹ کی اخلاقیات کمیٹی نے مہوا کے پیسوں کے لیے سوال پوچھنے کے الزامات کو سچ مانتے ہوئے پارلیمنٹ کی رکنیت ختم کرنے کی سفارش کی تھی۔مہوا پر بی جے پی کے رکن پارلیمنٹ نشی کانت دوبے نے پیسے لینے کے بعد سوال پوچھنے کا الزام لگایا تھا۔ مہوا پر الزام تھا کہ اس نے ایک تاجر درشن ہیرانندانی سے اڈانی کے بارے میں سوالات پوچھنے کے لیے پیسے لیے اور اپنا لاگ ان پاس ورڈ ہیرانندانی کے ساتھ شیئر کیا۔
