برن پور کریسنٹ اسکول میں جشن سر سید پر مختلف پروگرام منعقد

آسنسول،19اکتوبر (راست) میونسپل کارپوریشن کے وارڈ نمبر 83 میں واقع برن پور کریسنٹ ہائی سکول میں جشن سر سید کا انعقاد کیا گیا جس میں اسکول کے ڈائریکٹر سمیع اللہ ایڈوکیٹ نے افتتاحی کلمات کہے اور سر سید کی گراں قدر خدمات سے سامعین اور طلبہ کو روشناس کرایا۔ اس موقع پر دیگر مہمانوں میں انجینیئر خورشید غنی معروف شاعر خالق ادیب اور بڑی تعداد میں طلبہ کی گارجین موجود تھے۔ طلبہ نے مختلف علمی ادبی اور ثقافتی پروگرام پیش کیے جس میں تقریری مقابلہ نظم خوانی کا مقابلہ اور فی البدیہہ تقاریر وغیرہ شامل رہے۔ سر سید کی خدمات کو مشعل راہ بنا کر مستقبل کو کامیاب بنانے کی مہمانوں نے تلقین کی اسکول کی نگراں گلشن آرا بیگم نے بھی طلبہ کو ان کے تابناک مستقبل کے لیے نیک خواہشات پیش کیا اور مہمانوں کا شکریہ ادا کیا۔