سکھ دیو نگر تھانہ میں پولیس۔تاجر کمیٹی کی میٹنگ

امن و امان کی بہتری اور باہمی تعاون پر زور

جدید بھارت نیوز سروس
رانچی،2؍ اپریل: اپریل: جھارکھنڈ چیمبر آف کامرس کی پہل پر آج سکھ دیو نگر تھانہ میں پولیس-تاجر کمیٹی کا اجلاس منعقد ہوا۔ اجلاس میں تھانہ علاقے کے تاجروں اور پولیس انتظامیہ کے درمیان امن و امان کو مستحکم کرنے، باہمی ہم آہنگی بڑھانے اور علاقائی مسائل کے حل کے حوالے سے بامقصد تبادلہ خیال کیا گیا۔ تھانہ انچارج سنیل کشواہا نے تھانہ علاقے میں نشہ خوری پر قابو پانے اور امن و امان کی بہتری کے لیے کی جانے والی کوششوں سے آگاہ کیا۔ انہوں نے اہل علاقہ سے اپیل کی کہ نشہ خوری کے خاتمے میں پولیس کا تعاون کریں۔ اجلاس میں بڑھتی ہوئی نشہ خوری، علاقے کے اہم مقامات پر سی سی ٹی وی کیمروں کی تعداد بڑھانے اور حفاظتی انتظامات کو مزید مضبوط بنانے جیسے اہم مسائل پر تفصیلی گفتگو ہوئی۔ تھانہ انچارج نے بتایا کہ فی الوقت سکھ دیو نگر تھانہ میں 1 پی سی آر اور 4 ٹائیگر موبائل کام کر رہے ہیں۔ انہوں نے ان کے رابطہ نمبر بھی شیئر کیے۔ انہوں نے یہ بھی کہا کہ تھانہ کی سطح پر مسائل کے فوری حل کے لیے مسلسل کوششیں کی جا رہی ہیں، جس سے علاقے میں امن و امان کی صورتحال میں نمایاں بہتری آئی ہے۔ چیمبر کے جنرل سکریٹری روہت اگروال نے اس بات پر زور دیا کہ تھانہ میں عام لوگوں کے ساتھ شائستہ رویہ یقینی بنایا جائے تاکہ لوگ اپنی شکایت درج کرانے میں ہچکچاہٹ محسوس نہ کریں۔ لاء اینڈ آرڈر سب کمیٹی کے چیئرمین مکیش اگروال نے اہم بازاروں اور تجارتی علاقوں میں پولیس گشت بڑھانے، سماج دشمن عناصر اور مشتبہ سرگرمیوں پر کڑی نظر رکھنے اور وقتاً فوقتاً تاجروں کے ساتھ میٹنگیں منعقد کرنے کی تجویز دی۔ جوائنٹ سکریٹری نوجوت الینگ اور جوائنٹ سکریٹری روہت پودار نے تھانہ کی سطح پر پولیسنگ کو بہتر بنانے کے لیے مربوط کوششوں کی ضرورت پر زور دیا۔ سابق صدر کشور منتری نے پولیس اور تاجروں کے درمیان دوستانہ ماحول پیدا کرنے پر زور دیا۔ ممبران بندل ورما اور ششانک بھاردواج نے بھی علاقے کے امن و امان میں بہتری کے لیے اپنے خیالات کا اظہار کیا۔ مستقبل میں بھی اس طرح کے ہم آہنگی کے اجلاس منعقد کرنے پر اتفاق کیا گیا۔اجلاس میں چیمبر کے جنرل سکریٹری روہت اگروال، جوائنٹ سکریٹری نوجوت الینگ، روہت پودار، ایگزیکٹو ممبر اور لاء اینڈ آرڈر سب کمیٹی کے چیئرمین مکیش اگروال، سابق صدر کشور منتری، اراکین ششانک بھاردواج، راجیش پودار، رنجیت کمار، بندل ورما سمیت علاقے کے کئی تاجر شریک تھے۔