نمایاں کارکردگی کا مظاہرہ کرنے والے بچوں کو انعامات سے نوازا گیا
جدید بھارت نیوز سروس
اورمانجھی، 28؍ دسمبر: ہرچنڈہ مکتب میں پڑھنے والے بچوں کی تعلیمی نمائش اور اصلاحِ معاشرہ کانفرنس اتوار کو انجمن اصلاحُ المسلمین کمیٹی اور نوجوان کمیٹی ہرچنڈا سِلْدِری کی سرپرستی میں منعقد کی گئی۔ محفل میں نمایاں کارکردگی کا مظاہرہ کرنے والے بچوں کو انعامات سے نوازا گیا۔ محفل کا آغاز تلاوت کلام پاک سے ہوا۔ اس محفل میں بہار مدرسہ خیر المدارس کے مہتمم و استاد مولانا محبوب عالم مظاہری نے بطور مہمان خصوصی شرکت کی۔ جلسہ کی صدارت مولانا مفتی کوکدورو مدرسہ دارالعلوم حسینیہ نے کی۔ پروگرام کی نظامت ہرچنڈا مسجد کے امام و خطیب مولانا مفتی نے کی۔ اس دوران نعت خواں سفیان غازی اور رحیم اللہ سلامہ نے شاندار نعت شریف پڑھ کر محفل کی رونق میں اضافہ کیا۔ محفل میں مدرسہ کے طلباء نے اپنی سریلی آوازوں، قرأت، نعت پاک، تقاریر اور مناظرے سے حاضرین کو محظوظ کیا۔ محفل کے مہمان خصوصی مولانا محبوب عالم مظاہری نے کہا کہ اسلام امن و آشتی کا درس دیتا ہے۔ قرآن و حدیث کے بتائے ہوئے راستے پر چل کر ہی کامیابی حاصل کی جاسکتی ہے۔ محمد صلی اللہ علیہ وسلم نے بے سہارا لوگوں کو حقوق اور مراعات دیں۔ قرآن پاک پیارے نبی صلی اللہ علیہ وسلم پر نازل ہوا جو کہ جب تک دنیا ہے لوگوں کی رہنمائی کرتا رہے گا۔ مولانا عزیز نعمانی نے واضح کیا کہ نبی کریم صلی اللہ علیہ وسلم کو ساری دنیا کے لیے رحمت العالمین بنا کر بھیجا گیا ۔ اس موقع پر ہرچنڈا انجمن کے صدر ضیاءالانصاری، سیکرٹری حافظ خلیل انصاری، خزانچی ضمیر الدین انصاری، منہاج انصاری، حافظ افروز انصاری، حافظ مشرف حسین،مولانا مزمل، ممتاز، شمش، سحمت، تسلیم، امروز، تبریز، سجاد، سرور، مختار، امام الحق، فاروق، ذاکر، نسیم انصاری، اقبال، افسر، محسن وغیرہ خاص طور پر موجود تھے۔
