ہیمنت سورین کی موجودگی میں حکومت جھارکھنڈ اور انڈین بینک میں معاہدہ
جدید بھارت نیوز سروس
رانچی، 15 اپریل:۔ جھارکھنڈ حکومت اور انڈین بینک کے درمیان ریاست کے سرکاری ملازمین اور نیشنل ہیلتھ مشن (NHM) کے کارکنوں کے تنخواہ پیکیج اور ایچ آر آئی ایس (HRIS) پیکیج کو لے کر ایک اہم مفاہمت کی یادداشت (MoU) پر دستخط کیے گئے۔ اس معاہدے کے تحت ریاستی ملازمین بالخصوص صحت کے شعبے سے وابستہ کارکنوں کو 45 لاکھ روپے سے لے کر 2 کروڑ 57 لاکھ روپے تک کا انشورنس (بیمہ) کور فراہم کیا جائے گا۔ وزیر اعلیٰ ہیمنت سورین کی موجودگی میں جھارکھنڈ منترالیہ میں منعقدہ ایک خصوصی تقریب کے دوران اس معاہدے کو حتمی شکل دی گئی۔
صحت کارکنوں کے حوصلے بلند ہوں گے
اس موقع پر وزیر اعلیٰ ہیمنت سورین نے معاہدے کا خیرمقدم کرتے ہوئے کہا کہ صحت کا شعبہ حکومت کا لازمی حصہ ہے اور یہ ایم او یو صحت کارکنوں کے لیے بڑی مدد ثابت ہوگا۔ انہوں نے کورونا وبا کی مثال دیتے ہوئے کہا کہ زندگی میں کئی بار صحت کے بڑے چیلنجز آتے ہیں، جو متوسط طبقے کے خاندانوں کے لیے معاشی طور پر کمر توڑ ثابت ہوتے ہیں۔ وزیر اعلیٰ نے کہا کہ ان انفیکشنز کے دوران کام کرنے والے کارکن اکثر معاشی تحفظ کا مطالبہ کرتے تھے، جو اب اس پیکیج کی صورت میں پورا ہو رہا ہے۔ اس سے ملازمین کا مورال بلند ہوگا اور وہ زیادہ تندہی سے فرائض انجام دے سکیں گے۔
سماجی شعبے میں ناقص کارکردگی والے بینکوں پر پابندی
وزیر خزانہ رادھاکرشن کشور نے تقریب سے خطاب کرتے ہوئے واضح کیا کہ ریاستی حکومت نے فیصلہ کیا ہے کہ سماجی شعبے میں ناقص کارکردگی دکھانے والے بینکوں میں سرکاری رقم نہیں رکھی جائے گی۔ انہوں نے انڈین بینک کی کارکردگی کو سراہتے ہوئے بتایا کہ ریاست میں بینک کی 166 شاخیں ہیں اور 25 ہزار کروڑ روپے کے ڈپازٹس موجود ہیں۔ تاہم، انہوں نے گڑھوا، پلاموں اور چترا جیسے اضلاع میں بینک کی شاخیں نہ ہونے پر تشویش کا اظہار کیا اور بینک انتظامیہ سے ان علاقوں میں نیٹ ورک بڑھانے پر زور دیا۔
گروجی کریڈٹ کارڈ اسکیم پر اظہار برہمی
وزیر خزانہ نے ’گروجی کریڈٹ کارڈ اسکیم‘ کے حوالے سے بینکوں کی عدم توجہی پر برہمی کا اظہار کیا۔ انہوں نے انڈین بینک کی مثال دیتے ہوئے کہا کہ موصول ہونے والی 130 درخواستوں میں سے صرف 53 کو منظور کیا گیا، جو کہ کافی کم ہے۔ انہوں نے اپیل کی کہ طلبہ کو اعلیٰ تعلیم سے محروم ہونے سے بچانے کے لیے زیادہ سے زیادہ درخواستیں منظور کی جائیں۔ تقریب میں وزیر صحت ڈاکٹر عرفان انصاری نے بھی تمام ملازمین کو مبارکباد پیش کی اور انڈین بینک کا شکریہ ادا کیا۔
بینک کی جانب سے تعاون کی یقین دہانی
انڈین بینک کے منیجنگ ڈائریکٹر ونود کمار نے حکومت کو یقین دلایا کہ بینک سی ایس آر (CSR) سرگرمیوں کے تحت ایمبولینس، اسکول بسوں اور دیگر فلاحی کاموں کے لیے ہمہ وقت تیار ہے۔ انہوں نے کہا کہ حکومت کی طرف سے موصول ہونے والی کسی بھی تجویز پر بینک فوری عمل درآمد کرے گا۔ یہ ایم او یو ریاستی ملازمین بالخصوص صحت کے شعبے میں کام کرنے والے اہلکاروں کے لیے معاشی تحفظ اور بہتر سہولیات کو یقینی بنانے کی سمت میں ایک اہم قدم ہے۔
