جھارکھنڈ میں 7 تا 10 جون کے دوران مانسون کی آمد متوقع

انڈمان و نکوبار پہونچا مانسون ؛ 26 مئی تک کیرالہ میں دستک دینے کی امید

جدید بھارت نیوز سروس
رانچی، 24 مئی: جھارکھنڈ کے عوام کے لیے شدید گرمی کے بیچ ایک راحت بھری خبر سامنے آئی ہے۔ بھارت کے محکمہ موسمیات (IMD) کے مطابق، ملک میں جنوب مغربی مانسون کی آمد کے لیے حالات بالکل سازگار بنے ہوئے ہیں اور مانسون انڈمان و نکوبار جزائر تک پہنچ چکا ہے۔ محکمہ موسمیات نے پیش گوئی کی ہے کہ 26 مئی تک مانسون کے کیرالہ کے ساحل سے ٹکرانے کے قوی امکانات ہیں۔ کیرالہ میں دستک دینے کے بعد مانسون کی پیش رفت کی رفتار کو دیکھتے ہوئے یہ اندازہ لگایا گیا ہے کہ جھارکھنڈ میں مانسون 7 سے 10 جون کے درمیان سنتھال پرگنہ کے راستے داخل ہو سکتا ہے۔ واضح رہے کہ اس سال مئی کے مہینے میں جھارکھنڈ کا درجہ حرارت گزشتہ برس کے مقابلے 5 سے 7 ڈگری سیلسیس زیادہ ریکارڈ کیا جا رہا ہے۔ جن علاقوں میں پہلے درجہ حرارت 36 سے 38 ڈگری کے درمیان رہتا تھا، وہاں اب پارہ 40 سے 45 ڈگری تک پہنچ رہا ہے۔ مانسون کے داخلے کے اشاروں سے امید بندھی ہے کہ جون کے دوسرے ہفتے میں لوگوں کو اس شدید تپش اور لو کے قہر سے نجات مل سکے گی، تاہم مانسون کی آمد تک لوگوں کو فی الحال اس شدید گرمی کا سامنا کرنا پڑے گا۔