’یووا سوچ‘ کے وفد کی گورنر سے ملاقات

یونیورسٹیوں میں انٹرمیڈیٹ تعلیم بحال کرنے کا مطالبہ

جدید بھارت نیوز سروس
رانچی، 5جولائی: دارالحکومت رانچی میں کام کرنے والی سماجی تنظیم یوا سوچ کے ایک وفد نے راج بھون میں گورنر سنتوش کمار گنگوار سے ملاقات کی اور انہیں مطالبات کا ایک میمورنڈم سونپا۔ میمورنڈم کے ذریعے وفد نے ریاست بھر کے سرکاری کالجوں میں انٹرمیڈیٹ کی پڑھائی دوبارہ شروع کرنے اور نئے انٹرمیڈیٹ کالجوں کی تعمیر کا مطالبہ کیا۔اس موقع پر تنظیم کے صدر کرشنا مشرا نے کہا کہ ریاست میں سرکاری سطح پر انٹرمیڈیٹ کی پڑھائی بند ہونے کی وجہ سے خاص طور پر دیہی اور دور دراز علاقوں سے تعلق رکھنے والے طلباء کو کافی پریشانیوں کا سامنا کرنا پڑ رہا ہے۔انہوں نے کہا کہ پرائیویٹ اسکولوں میں داخلہ لینے سے ان طلباء کے لیے رکاوٹیں پیدا ہو رہی ہیں اور مجبوری میں ان علاقوں کے طلباء پرائیویٹ اداروں کا رخ کر رہے ہیں جس کی وجہ سے مالی بوجھ بھی بڑھ رہا ہے۔یوا سوچ کے وفد نے گورنر پر زور دیا کہ وہ اس سنگین تعلیمی مسئلہ کا نوٹس لیں اور مناسب قدم اٹھائیں، تاکہ ریاست کے طلباء کو مساوی اور قابل رسائی تعلیم حاصل ہو سکے۔اس موقع پر تنظیم کے صدر کرشنا مشرا، نتیش مشرا، کشاگرا سنگھ راجپوت وغیرہ موجود تھے۔وفد کو امید ہے کہ گورنر اس معاملے میں مثبت پہل کریں گے۔