’’یوا سنواد چوپال یاترا ‘‘ کے اختتامی تقریب میں آر جے ڈی کے لیڈروں کا اجتماع

ستیانند بھوگتا نے نوجوانوں سے سماجی انصاف اور ملکی تعمیر میں فعال کردار ادا کرنے کی اپیل کی

جدید بھارت نیوز سروس
رام گڑھ، 30؍ جون: راشٹریہ جنتا دل (آر جے ڈی) کے یوتھ ونگ کے زیر اہتمام منعقدہ ‘یوا سنواد چوپال یاترا ‘ اور اختتامی تقریب کا انعقاد ضلع رام گڑھ کے پتراتو واقع مڈوے ریزورٹ میں پرجوش ماحول میں مکمل ہوا۔ تقریب میں جھارکھنڈ حکومت کے سابق وزیر ستیانند بھوگتا نے بطور مہمانِ خصوصی شرکت کی۔ تقریب میں بڑی تعداد میں نوجوان کارکنوں، پارٹی عہدیداران اور لیڈروں کی موجودگی نے اسے سیاسی نقطہ نظر سے اہم بنا دیا۔پروگرام کے دوران یوتھ آر جے ڈی کے ریاستی صدر رنجن یادو نے سابق وزیر ستیانند بھوگتا کا گلدستہ اور انگ وستر پیش کر کے پرتپاک استقبال کیا۔ موجود کارکنوں نے زوردار نعروں اور تالیوں کے ساتھ ان کا خیرمقدم کیا۔اپنے خطاب میں سابق وزیر ستیانند بھوگتا نے کہا کہ کسی بھی ریاست اور ملک کا مستقبل اس کی نوجوان طاقت پر منحصر ہوتا ہے۔ انہوں نے کہا کہ اگر نوجوانوں کو صحیح سمت، معیاری تعلیم اور روزگار کے مواقع فراہم کیے جائیں تو وہ معاشرے اور قوم کی تعمیر میں اہم کردار ادا کر سکتے ہیں۔
انہوں نے نوجوانوں سے سماجی انصاف، تعلیم، روزگار، جمہوری اقدار اور عوامی مفاد کے مسائل پر بیدار اور فعال رہنے کی اپیل کی۔انہوں نے کہا کہ نوجوانوں کو صرف سیاست تک محدود نہیں رہنا چاہیے، بلکہ معاشرے کے ہر شعبے میں مثبت کردار ادا کرتے ہوئے ترقی کے مرکزی دھارے سے جڑنا چاہیے۔ ساتھ ہی انہوں نے کارکنوں سے اپیل کی کہ وہ راشٹریہ جنتا دل کے قومی صدر لالو پرساد یادو کے سماجی انصاف، مساوات اور سب کی شمولیت والی ترقی کے نظریات کو گاؤں گاؤں اور عوام تک پہنچائیں۔پروگرام کے دوران تنظیم کو مزید مضبوط بنانے، نوجوانوں کو پارٹی سے جوڑنے اور آئندہ سیاسی چیلنجوں کے لیے تنظیمی حکمت عملی پر بھی تفصیلی تبادلہ خیال کیا گیا۔ مقررین نے نوجوانوں سے جمہوری اقدار کا تحفظ کرتے ہوئے معاشرے کے پسماندہ اور کمزور طبقات کی آواز بننے کی اپیل کی۔اس موقع پر آر جے ڈی جھارکھنڈ کے ریاستی انچارج جے پرکاش نارائن یادو، ریاستی صدر سنجے سنگھ یادو، وزیر سنجے پرساد یادو، چترا لوک سبھا کے سابق امیدوار سبھاش یادو، سابق ایم ایل اے ستیش داس سمیت پارٹی کے کئی سینئرلیڈر، عہدیداران اور بڑی تعداد میں نوجوان کارکن موجود رہے۔ تقریب کا اختتام تنظیم کو مزید مستحکم بنانے اور نوجوانوں کی فعال شرکت کو یقینی بنانے کے عزم کے ساتھ ہوا۔