ہر ضلع رہے الرٹ، ہر نقصان کا فوری اندازہ

ہر ضلع رہے الرٹ، ہر نقصان کا فوری اندازہ اور معاوضے کی ادائیگی میں تاخیر نہ ہو : وزیر عرفان انصاری

رانچی، 29 جون (یواین آئی) جھارکھنڈ میں مسلسل موسلادھار بارش، آبی جماؤ اور سیلاب کو سنجیدگی سے لیتے ہوئے ڈیزاسٹر مینجمنٹ کے وزیر ڈاکٹر عرفان انصاری مسلسل نگرانی کر رہے ہیں۔ریاستی حکومت نے پورے جھارکھنڈ کو الرٹ موڈ پررکھتے ہوئے تمام ڈپٹی کمشنروں، سپرنٹنڈنٹ آف پولیس اور متعلقہ محکموں کو 24 گھنٹے چوکس رہنے کی سخت ہدایات جاری کی ہیں۔وزیر ڈاکٹر عرفان انصاری نے واضح الفاظ میں کہا کہ یہ ہمارا فرض ہے کہ ہر متاثرہ فرد تک امداد بروقت پہنچے۔ یہ صرف انتظامی ذمہ داری نہیں ہے بلکہ انسانی ذمہ داری ہے۔ ہر ضلع سے نقصانات کا فوری تخمینہ لگایا جائے اور رپورٹ فوری طور پر محکمہ کو بھجوائی جائے، تاکہ جلد از جلد معاوضہ مل سکے۔غور طلب ہے کہ 19 جون کو بھی ڈاکٹر انصاری نے بھاری بارش کے سلسلے میں ریاست گیر ایڈوائزری جاری کی تھی، جس میں ’کیا کریں اور کیا نہ کریں‘کے بارے میں ہدایات دی گئی تھیں اور تمام اضلاع کو سخت چوکسی رکھنے کا حکم دیا گیا تھا۔ اسی کو آگے بڑھاتے ہوئے آج وزیر نے ایک اعلیٰ سطحی جائزہ اجلاس کے بعد تمام اضلاع کو ایک بار پھر ہدایات دی ہیں کہ ”باقی اضلاع میں معاوضے کی تقسیم جلد مکمل کی جائے اور کسی بھی متاثرہ خاندان کو کہیں بھی امداد سے محروم نہ رکھا جائے۔وزیر ڈاکٹر انصاری نے کہا کہ میں خود اس سارے عمل کی نگرانی کر رہا ہوں۔ یہ میری ذمہ داری ہے، اور میں 24x7 الرٹ موڈ میں ہوں۔ محکمہ کا ہر افسر، ہر ملازم زمینی سطح پر متحرک ہے۔ کسی قسم کی غفلت برداشت نہیں کی جائے گی۔ متاثرہ اضلاع میں امدادی رقم کی تقسیم تیزی سے جاری ہے، ریڈ الرٹ والے اضلاع میں اسکول بند کرنے کی سفارش، انتظامیہ کو مکمل چوکس رہنے کی ہدایت، میڈیا، عوامی نمائندوں اور پنچایت سطح پر ایڈوائزری کی وسیع تشہیر، آبی جماؤ، بجلی کے حادثات، صحت کے بحران سے نمٹنے کے لیے خصوصی ہدایات دی گئی ہیں۔