ڈویژنل کمشنر نے منوج کمار نے چترا کے مختلف سرکاری اداروں کا اچانک معائنہ کیا

محض دفتری کارروائی کے بجائے زمینی کام کو ترجیح دینے کی ہدایت

جدید بھارت نیوز سروس
چترا،9؍مئی: نارتھ چھوٹا ناگپور ڈویژن، ہزاری باغ کے ڈویژنل کمشنر منوج کمار چترا ضلع کے دورے پر پہنچے۔ کلکٹریٹ میں ڈی سی روی آنند کے استقبال کے بعد کمشنر کا پروگرام محض رسمی کارروائیوں تک محدود نہیں رہا، بلکہ انہوں نے مختلف محکموں اور اداروں کی زمینی حقیقت جاننے کے لیے معائنے کا سلسلہ شروع کر دیا۔ چند گھنٹوں میں کمشنر نے آنگن واڑی مراکز، متعلّقہ سرکل دفاتر، چلڈرن ہوم اور مہیلا سماکھیا بھون کا گہرائی سے معائنہ کیا۔ ہر جگہ انہوں نے ملازمین اور افسران سے براہِ راست گفتگو کرتے ہوئے خدمات کے معیار، انتظامات اور دستاویزات کی جانچ کی۔
آنگن واڑی مراکز میں غذائیت، تعلیم اور سہولیات کی تفصیلی جانچ
کمشنر نے اپنے معائنے کا آغاز گدھور بلاک کے دواری پوربی اور باریاتو آنگن واڑی مراکز سے کیا۔ دواری پوربی مرکز میں 31 میں سے 25 بچوں کی حاضری دیکھ کر انہوں نے اطمینان کا اظہار کیا اور بچوں سے ابتدائی تعلیم کے سوالات پوچھے، جن کے صحیح جوابات پر خوشی ظاہر کی۔ تاہم، پینے کے صاف پانی، واٹر فلٹر اور بیت الخلا جیسی بنیادی سہولیات کو بہتر بنانے کی ہدایت دی۔ اس دوران ایک معذور شخص کو ٹرائی سائیکل اور ایک ضرورت مند کو وہیل چیئر بھی فراہم کی گئی۔باریاتو مرکز میں 28 میں سے 22 بچے حاضر ملے، لیکن روشنی، پنکھے، پینے کے پانی اور وزن کرنے والی مشین کی خرابی پر کمشنر نے سخت برہمی کا اظہار کیا۔ انہوں نے کہا کہ آنگن واڑی مراکز بچوں کے مستقبل کی بنیاد ہیں، یہاں کسی بھی قسم کی لاپرواہی ناقابلِ قبول ہے۔
چترا سرکل دفتر کا معائنہ-ریونیو کاموں میں تیزی اور شفافیت پر زور
چترا صدر انچل دفتر پہنچ کر کمشنر نے فائلوں، ریکارڈ کی دیکھ بھال، عملے کی حاضری اور رجسٹروں کی جانچ کی۔ امین (پیمائش کرنے والے عملے) کی کمی پر سخت رخ اختیار کرتے ہوئے انہوں نے فوری کارروائی کی ہدایت دی۔ انہوں نے کہا کہ زمین کی پیمائش اور ریونیو کے کاموں میں تاخیر براہِ راست عوام کو متاثر کرتی ہے، اس لیے امین کی دستیابی کو یقینی بنایا جائے۔ صفائی ستھرائی اور سروس بک کی دیکھ بھال میں بہتری لانے کا حکم دیتے ہوئے انہوں نے واضح کیا کہ ریونیو معاملات میں عوام کے وقت کا احترام کیا جانا چاہیے اور غیر ضروری تاخیر برداشت نہیں کی جائے گی۔پکریا میں واقع مشن وتسالیہ کے تحت چلنے والے بوائز اور گرلز ہوم میں کمشنر نے سی سی ٹی وی، سیکورٹی اور رہائشی انتظامات کا معائنہ کیا۔ انہوں نے بچیوں سے تعلیم، خوراک اور ذاتی ضروریات کے بارے میں معلومات لیں۔ انہوں نے حکم دیا کہ بچوں کی بحالی کا عمل بلاوجہ التواء کا شکار نہیں ہونا چاہیے اور معذور بچوں کے لیے ہر ماہ اشاروں کی زبان (Sign Language) کے ماہر کی خدمات حاصل کی جائیں۔ انہوں نے کمپیوٹر، سلائی کڑھائی اور ٹائپنگ جیسی پیشہ ورانہ تربیت فوری شروع کرنے کی سخت ہدایت دی تاکہ بچے خود کفیل بن سکیں۔
مہیلا سماکھیا بھون کا معائنہ-خواتین کی بااختیاری پر زور
مہیلا سماکھیا بھون میں کمشنر نے تربیتی پروگراموں کی پیش رفت اور ریکارڈ کا جائزہ لیا اور خواتین کے گروپوں کو بااختیار بنانے کے عمل کو تیز کرنے کی ہدایت دی۔
انتظامیہ کو “اصلاح کی چیک لسٹ” موصول
کمشنر منوج کمار نے معائنے کے بعد واضح پیغام دیا کہ سستی برداشت نہیں کی جائے گی۔ انہوں نے شفاف نظام، بروقت خدمات اور بچوں و خواتین کی حفاظت کو اولین ترجیح قرار دیا۔ اس معائنے کے دوران ڈی سی روی آنند، ڈی ڈی سی امریندر کمار سنہا، ڈی پی آر او محمد شکیل احمد اور دیگر ضلعی انتظامی افسران موجود تھے۔