سڑک حادثات کی روک تھام اور معاوضے کے طریقہ کار پر تفصیلی بحث
جدید بھارت نیوز سروس
چترا،28؍مارچ: چترا سول کورٹ کے آڈیٹوریم میں موٹر ایکسیڈنٹ کلیم ٹربیونل (MACT) اور تکنیکی موضوعات پر مبنی ایک اہم ورکشاپ کا انعقاد کیا گیا۔ اس ورکشاپ میں ضلع لیگل سروسز اتھارٹی (ڈالسا) چترا کے سکریٹری تارکیشور داس نے بطور مہمانِ خصوصی شرکت کی۔ پروگرام میں موٹر وہیکل حادثات، ان سے متعلق قانونی کارروائیوں اور متاثرین کو دستیاب سرکاری امداد کے حوالے سے تفصیلی تبادلہ خیال کیا گیا۔ورکشاپ کے دوران سڑک حادثات کی روک تھام، حادثے کے بعد متاثرین کو فوری امداد، اور زخمی افراد کو علاج کے دوران ملنے والی سرکاری سہولیات کے بارے میں گہری معلومات فراہم کی گئیں۔ متوفی کے ورثاء کو معاوضہ دینے کے طریقہ کار، جیسے پوسٹ مارٹم رپورٹ، ابتدائی تحقیقات، ضروری دستاویزات اور کلیم (دعویٰ) دائر کرنے کے طریقے پر بھی تفصیلی رہنمائی دی گئی۔اس کے ساتھ ہی شرکاء کو موٹر وہیکل ایکٹ کی دفعات، قوانین کی خلاف ورزی پر عائد ہونے والی سزاؤں اور جرمانے کے ڈھانچے کے بارے میں تفصیل سے بتایا گیا۔ بڑھتے ہوئے سڑک حادثات کے پیش نظر سڑک تحفظ بیداری مہم کو مزید وسیع پیمانے پر چلانے پر زور دیا گیا، تاکہ عام لوگوں میں ٹریفک قوانین کے تئیں ذمہ داری اور چوکسی پیدا ہو۔پروگرام میں ڈسٹرکٹ لیگل سروسز اتھارٹی کے زیر اہتمام چلائی جانے والی مختلف فلاحی اسکیموں اور بیداری کے پروگراموں پر بھی تفصیل سے بات چیت کی گئی۔ اس موقع پر پینل لائرز، نیشنل کنسلٹنٹ ٹیم کے ارکان اور ضلع کے تمام پی ایل وی (PLV) بڑی تعداد میں موجود تھے، جنہوں نے اس ورکشاپ کو کامیاب بنانے میں فعال کردار ادا کیا۔
