محکمہ تعلیم کی سفارش پر جے ایس ایس سی نے امیدواروں کی فہرست واپس طلب کی
جدید بھارت نیوز سروس
رانچی، 24 اگست:۔ جھارکھنڈ میں اسسٹنٹ آچاریہ کی تقرری کے عمل پر ایک نیا تنازعہ سامنے آیا ہے۔ اسکول ایجوکیشن ڈپارٹمنٹ نے سائنس، میتھ اور زبان کے 2742 کامیاب امیدواروں کی تقرری کی سفارش واپس لے لی ہے۔ یہ فیصلہ جھارکھنڈ اسٹیٹ سیلیکشن کمیشن (JSSC) کے 2023 کے نتائج پر اٹھے اعتراضات کے بعد لیا گیا ہے۔ نتائج کے اعلان کے بعد یہ اعتراضات سامنے آئے کہ کئی امیدواروں نے جے ٹی ای ٹی (Jharkhand Teacher Eligibility Test) میں ریزرویشن کا فائدہ اٹھا کر امتحان پاس کیا، لیکن انہیں تقرری کے وقت عمومی کیٹگری میں شامل کر دیا گیا۔ مزید یہ کہ کچھ امیدواروں نے کم سے کم نمبر حاصل کیے تھے، پھر بھی انہیں فہرست میں شامل کر لیا گیا، جس سے اضلاع میں تنازعہ پیدا ہوا۔
محکمہ کی کارروائی
محکمہ تعلیم نے تمام اضلاع کے ڈسٹرکٹ کمشنرز کو خط ارسال کر کے ان سے درخواست کی کہ وہ سفارشات اور متعلقہ دستاویزات فوری طور پر واپس کر دیں۔ یہ فیصلہ اس لیے لیا گیا تاکہ کمیشن پورے نتائج کا دوبارہ جائزہ لے سکے۔
آگے کا عمل
محکمہ کے مطابق، جے ایس ایس سی کو اب نتائج کا دوبارہ جائزہ لینا ہوگا، خاص طور پر ان معاملات پر، جہاں ریزرویشن کے امیدواروں کو غلط طور پر عام کٹیگری میں شامل کیا گیا تھا۔ توقع ہے کہ کمیشن نئے نتائج کے ساتھ ترمیم شدہ فہرست جاری کرے گا۔
دیگر موضوعات پر بھی سوالات
سائنس، میتھ اور زبان کے علاوہ کمیشن نے سوشیل سائنس (3033 عہدے) اور کلاس 1 سے 5 (4817 عہدے) کے نتائج بھی جاری کیے تھے، لیکن ان کی سفارشات ابھی تک نہیں بھیجی گئی ہیں۔ اس پر بھی اصلاحات کی گنجائش ہے۔
15 ہزار اسسٹنٹ آچاریہ کی تقرری کا عمل غیر یقینی
ریاستی حکومت نے مجموعی طور پر 15,001 اسسٹنٹ آچاریہ کی تقرری کا عمل شروع کیا تھا، جس میں مختلف مضامین شامل تھے۔ تاہم، 2742 سفارشات کی واپسی اور دیگر معاملات کی جانچ نے اس عمل کو غیر یقینی بنا دیا ہے۔ جھارکھنڈ میں اساتذہ کی تقرری کے حوالے سے یہ نیا تنازعہ اس بات کا غماز ہے کہ شفافیت کے بغیر تقرری کے عمل کو آگے نہیں بڑھایا جا سکتا۔
