پاکستان کے سپریم کورٹ کے احاطے میں دھماکہ

اسلام آباد، 4 نومبر (ہ س)۔ پاکستان کے دارالحکومت اسلام آباد میں سپریم کورٹ کے احاطے میں آج ایک زوردار دھماکہ ہوا۔ زخمیوں کی تعداد کے حوالے سے پاکستانی میڈیا کی رپورٹیں متضاد ہیں۔ دھماکے سے عدالت کے اندر خوف وہراس پھیل گیا، لوگ اپنی جان بچا کر بھاگنے لگے۔ وفاقی حکومت یا سپریم کورٹ کی جانب سے ابھی تک کوئی باضابطہ بیان جاری نہیں کیا گیا۔ میڈیا رپورٹس کے مطابق بم ڈسپوزل دستہ عدالت پہنچ گیا ہے۔ ڈان اخبار نے مقامی میڈیا کے حوالے سے خبر دی ہے کہ اسلام آباد میں سپریم کورٹ کی عمارت میں دھماکہ ہوا۔ میڈیا نے بتایا کہ اس واقعے میں متعدد افراد زخمی ہوئے ہیں، تاہم ہلاکتوں کی کوئی اطلاع نہیں ہے۔ ابتدائی طور پر میڈیا رپورٹس کے مطابق دھماکہ گیس سلنڈر کی وجہ سے ہوا۔ بعد میں بتایا گیا کہ دھماکہ ایئرکنڈیشنر میں ہوا۔ دھماکے کی کئی ویڈیوز سامنے آئی ہیں، جن میں عدالت کی عمارت کے اندرونی حصوں کو نقصان پہنچا ہے، فرش پر خون کے دھبے ہیں۔ ڈان کے قانونی نمائندے کے مطابق دھماکا تہہ خانے میں واقع کیفے ٹیریا میں ہوا۔