امریکہ میں کار ریس کے دوران خوفناک حادثہ

درجنوں گاڑیاں آپس میں ٹکراگئیں

الباما،27 اپریل ( یو این آئی)امریکی ریاست الباما کے شہر ٹالاڈیگا میں کار ریس کے دوران خوفناک حادثہ پیش آیا جس میں درجنوں گاڑیاں آپس میں ٹکراگئیں۔ تفصیلات کے مطابق ڈرائیور بوبا والیس کی ایک حرکت ٹالاڈیگا ریس کے دوران بڑے حادثے کا سبب بن گئی جس میں 26 سے زائد گاڑیاں آپس میں ٹکرا گئیں۔یہ واقعہ ریس کے ایک اہم مرحلے پر پیش آیا جب تیز رفتاری اور قریبی مقابلے کے باعث ڈرائیورز کو اپنی گاڑیوں پر قابو رکھنا مشکل ہو گیا۔ رپورٹس کے مطابق والیس کی گاڑی کے اچانک رخ بدلنے سے پیچھے آنے والی گاڑیاں ایک دوسرے سے ٹکرا گئیں اور دیکھتے ہی دیکھتے یہ حادثہ ایک بڑے حادثے میں تبدیل ہو گیا۔حادثے کے بعد ٹریک پر ہر طرف تباہ شدہ گاڑیوں کے مناظر دیکھنے کو ملے جس کے باعث ریس کو کچھ دیر کے لیے روکنا پڑا۔ ریس حکام نے فوری طور پر امدادی کارروائیاں شروع کیں اور ڈرائیورز کی حفاظت کو یقینی بنایا۔ خوش قسمتی سے اس حادثے میں کوئی جانی نقصان رپورٹ نہیں ہوا تاہم کئی گاڑیاں بری طرح متاثر ہوئیں جس سے ریس کے نتائج پر بھی اثر پڑا۔