اسمبلی عام انتخابات 2024 کے پیش نظر ریٹرننگ آفیسر سمریا اور چترا نے مختلف چوکیوں کا معائنہ کیا
جدید بھارت نیوز سروس
چترا، 20اکتوبر: چترا اور سمریا اسمبلی حلقوں میں 13 نومبر کو ووٹنگ ہونی ہے۔ اس سلسلے میں ضلع الیکشن آفیسر و ڈپٹی کمشنر رمیش گھولپ کی ہدایات کے مطابق اسمبلی عام انتخابات 2024 کے پیش نظر ضلع کے بین ریاستی اور بین ضلعی چیک پوائنٹس پر 24×7 چیکنگ مہم چلائی جارہی ہے۔ تاکہ انتخابات سے متعلق کام منصفانہ، شفاف، آزادانہ اور خوف و ہراس سے پاک ماحول میں مکمل ہو سکے۔ اس کے ساتھ ہی ایس ایس ٹی ٹیم کے ساتھ ساتھ بینک، محکمہ جنگلات، محکمہ آبکاری، جی ایس ٹی اور متعلقہ محکموں کے ساتھ نافذ کرنے والی ایجنسیوں کے ضلع سطح کے نوڈل افسران کے ذریعہ بھی تحقیقاتی مہم چلائی جارہی ہے۔ ڈسٹرکٹ الیکشن آفیسر نے انتخابات کو منصفانہ، شفاف، آزادانہ اور خوف و ہراس سے پاک ماحول میں کرانے کے لئے سنیچر کے روز عہدیداروں کے ساتھ میٹنگ کی اور سختی سے ہدایات دیں کہ الیکشن کمیشن کی طرف سے جاری کردہ ہدایات پر مکمل عمل درآمد یقینی بنایا جائے۔ ہفتہ کو ہی ریٹرننگ آفیسر کم سب ڈویژنل آفیسر سمریا سنی راج اور ریٹرننگ آفیسر کم سب ڈویژنل آفیسر چترا ظہور عالم نے مختلف چیک پوائنٹس پر جاری تحقیقات کا اچانک معائنہ کیا۔ اس کے علاوہ چترا اور سمریا کے مختلف ہوٹلوں پر بھی چھاپے مارے گئے۔
