تعطیلات کے اجتماعات اور ’جے این.ون‘ ویرینٹ نے کورونا وائرس کی شدت میں اضافہ کر دیا: عالمی ادارہ صحت

جنیوا: عالمی ادارہ صحت (ڈبلیو ایچ او) کے سربراہ ٹیدروس ادھانوم غیبریسس نے کہا ہے کہ تعطیلات کے اجتماعات اور عالمی سطح پر اثر انداز جے این.ون ویرینٹ نے دسمبر میں دنیا بھر میں کورونا وائرس کے پھیلاؤ کو ہوا دی۔

غیبریسس نے بدھ کو جنیوا میں ایک ورچوئل پریس بریفنگ میں بتایا کہ دسمبر میں ڈبلیو ایچ او کو کورونا وائس سے تقریباً 10000 اموات کی اطلاع دی گئی، جب کہ ہسپتالوں میں داخل ہونے اور آئی سی یوز میں پچھلے مہینے کے مقابلے میں 42 فیصد اضافہ ہوا۔

خبر رساں ایجنسی سنہوا نے رپورٹ کیا کہ صحت ایجنسی کے ڈائریکٹر جنرل نے کہا کہ رجحانات 50 سے کم ممالک کے اشتراک کردہ ڈیٹا سے اخذ کیے گئے ہیں، جن میں سے زیادہ تر یورپ اور امریکہ میں ہیں۔ انہوں نے مزید کہا کہ ان کا خیال ہے کہ دوسرے ممالک اضافہ ریکارڈ نہیں کر رہے ہیں۔

انہوں نے خبردار کیا کہ اگرچہ کورونا کی وبا اب عالمی صحت کی ہنگامی صورتحال نہیں ہے لیکن یہ وائرس اب بھی پھیل رہا ہے، بدل رہا ہے اور لوگوں کو ہلاک کر رہا ہے۔ ڈبلیو ایچ او کی کووڈ19 تکنیکی سربراہ، ماریا وان کارخوف نے دنیا بھر میں سانس کی بیماریوں میں اضافے کے لیے کورونا وائرس، فلو، رائنو وائرس اور نمونیا کو ذمہ دار ٹھہرایا۔ انہوں نے کہا کہ ’’ہم توقع کرتے ہیں کہ شمالی نصف کرہ کے موسم سرما کے مہینوں میں جنوری تک یہ رجحانات جاری رہیں گے۔‘‘