جدید بھارت نیوز سروس
رانچی، 18 ستمبر:۔ جھارکھنڈ کے مختلف اضلاع میں اسکولی بچوں سمیت خواتین اور نابالغ لڑکیوں کے خلاف بڑھتے ہوئے جرائم کو روکنے کے لیے دائر ایک PIL پر جھارکھنڈ ہائی کورٹ میں سماعت ہوئی۔ بدھ کو ہوئی سماعت کے دوران ریاست کے داخلہ سکریٹری، محکمہ شہری ترقی کے سکریٹری، خواتین اور بچوں کی ترقی کے سکریٹری، رانچی کے ڈی سی، میونسپل کارپوریشن کے میونسپل کمشنر اور رانچی کے ایس ایس پی عدالت میں پیش ہوئے۔ خواتین کی حفاظت پر تشویش کا اظہار کرتے ہوئے عدالت نے زبانی طور پر کہا کہ رانچی میں چین اسنیچنگ اور خواتین کے خلاف جرائم کے واقعات میں اضافہ ہوا ہے اور اسے روکا نہیں جا رہا ہے، یہ تشویشناک ہے۔اس پر سیکریٹری داخلہ نے عدالت کو بتایا کہ وہ تمام اسکولوں کی انتظامیہ کے ساتھ میٹنگ کریں گے تاکہ اسکول کے بچے بحفاظت اپنے گھروں تک پہنچیں اور انہیں خوف سے پاک ماحول ملے۔ ریاستی حکومت کی طرف سے تجاویز پیش کرنے کے لیے وقت دینے کا مطالبہ کیا گیا، جسے قبول کر لیا گیا اور حلف نامہ کے ذریعے 30 ستمبر تک تجاویز کے بارے میں معلومات مانگی گئی۔ اس کے ساتھ ہی عدالت نے حکومت کو ہدایت دی ہے کہ جرائم کی روک تھام کے لیے جاری کردہ ہیلپ لائن نمبرز کو بڑے پیمانے پر عام کیا جائے تاکہ لوگ ضرورت پڑنے پر ان کا استعمال کرسکیں، اس سلسلے میں مفاد عامہ کی عرضی دائر کی گئی ہے۔ ریاستی حکومت کی طرف سے ایڈیشنل ایڈوکیٹ جنرل سچن کمار نے کیس پیش کیا۔ ہائی کورٹ کے قائم مقام چیف جسٹس سوجیت نارائن پرساد اور جسٹس ارون کمار رائے کی ڈویژن بنچ اس کیس کی سماعت کر رہی ہے۔
