لاہور اور ملتان میں ہیلتھ ایمرجنسی نافذ؛ آئندہ ہفتے مکمل لاک ڈاؤن لگانے کا عندیہ
لاہور 15 نومبر (ایجنسی) پاکستان کے صوبہ پنجاب کی حکومت نے اسموگ سے متاثرہ افراد کی تعداد بڑھنے پر ہیلتھ ایمرجنسی نافذ کر دی ہے جس کے تحت اسپتالوں میں عملے کی چھٹیاں بھی منسوخ کر دی گئی ہیں۔ حکومت نے اسکول مزید ایک ہفتہ بند رکھنے کا بھی اعلان کیا ہے۔ابتدائی طور پر ہیلتھ ایمرجنسی کا نفاذ صوبے کے سب سے زیادہ آلودہ رہنے والے شہروں لاہور اور ملتان میں کیا گیا ہے۔ مریضوں کی تعداد بڑھنے پر پنجاب حکومت نے آئندہ ہفتے لاک ڈاؤن لگانے کا بھی عندیہ دیا ہے۔ دونوں اضلاع ملتان اور لاہور میں اسکول، کالجز اور یونی ورسٹیز کو آن لائن کیا جا رہا ہے۔یہ اعلان جمعے کو سینئر وزیر پنجاب مریم اورنگزیب نے لاہور میں نیوز کانفرنس کے دوران کیا۔اُن کا کہنا تھا کہ اسموگ ہیلتھ کرائیسس میں تبدیل ہو چکی ہے۔ موٹر سائیکل پر ایمرجنسی کے علاوہ باہر نہ نکلیں اور ماسک کا استعمال کریں۔اُن کا کہنا تھا کہ اسموگ چھ ماہ یا ایک سال میں ختم نہیں ہو گی اس کے لیے تین، تین ماہ کے شارٹ ٹرم پلان لا رہے ہیں۔ہیلتھ ایمرجنسی کا اعلان کرتے ہوئے مریم اورنگزیب نے کہا کہ ریسٹورنٹس میں شام چار بجے تک ڈائن اِن ہو سکے گا جب کہ اس کے بعد رات آٹھ بجے تک ٹیک آوے کی اجازت ہو گی۔اُن کا کہنا تھا کہ ملتان اور لاہور میں ہفتے سے اگلے اتوار تک تعمیرات پر پابندی عائد کر دی گئی ہے۔
سانس کے مریضوں کی تعداد ایک ماہ میں ڈیڑھ لاکھ
سینئر وزیر پنجاب کا کہنا تھا کہ پنجاب بھر سے ایک ماہ کے دوران سانس کی بیماریوں کے مریضوں میں اضافہ ہوا ہے اور یہ تعداد ڈیڑھ لاکھ تک جا پہنچی ہے۔اُنہوں نے مزید کہا کہ کرونا پر احتیاطی تدابیر اختیار کیں اسی طرح اسموگ پر احتیاطی تدابیر اختیار کرنا ہوں گی۔مریم اورنگ زیب نے کہا کہ اسموگ بھارت اور پاکستان کے عوام کا مسئلہ ہے۔ دونوں ممالک کو ایک ساتھ بیٹھنا پڑے گا۔ دوسری جانب صوبہ پنجاب میں اسموگ سے متاثرہ افراد کی تعداد روزانہ کی بنیاد پر بڑھ رہی ہے۔محکمہ صحت پنجاب کے مطابق اسمو گ کے باعث شہری سانس، دمے، دل کے امراض اور فالج میں مبتلا ہو رہے ہیں۔
دِل، دمے اور فالج کے مریضوں میں اضافہ
محکمہ صحت پنجاب کے مطابق لاہور جو دنیا کے آلودہ ترین شہروں میں مسلسل سرِ فہرست رہا ہے وہاں اکتوبر میں اسموگ سے ہونے والی بیماریوں کے مریضوں کی تعداد میں اضافہ دیکھا گیا ہے۔صرف لاہور میں اکتوبر میں بیماریاں کی شرح 5.41 فی صد سے بڑھ کر 5.74 فی صد ریکارڈ ہوئی جن میں ناک اور گلے کی انفکیشن کے کیسز میں 4.99 فی صد کے مقابلے میں 5.30 فی صد تک اضافہ دیکھا گیا ہے۔
