اسرائیل 183 فلسطینیوں کو آزاد کرے گا
غزہ، یکم فروری (یو این آئی)جنوبی اور شمالی غزہ میں دو الگ الگ مقامات سے 3 اسرائیلی قیدیوں کیتھ سیگل، اوفر کلڈرون اور یارڈن بیبس کو رہا کر دیا گیا ہے۔قطری نشریاتی ادارے الجزیرہ کے مطابق فلسطینی قیدیوں کی سوسائٹی کا کہنا ہے کہ غزہ میں قید قیدیوں کے چوتھے تبادلے میں 183 فلسطینی قیدیوں کو اسرائیلی جیلوں سے رہا کیا جائے گا۔عالمی ادارہ صحت کا کہنا ہے کہ بیرون ملک علاج کی ضرورت رکھنے والے 50 فلسطینیوں کو مصر کے ساتھ دوبارہ کھولے گئے رفح کراسنگ کے ذریعے غزہ چھوڑنے کی اجازت دی جائے گی۔اسرائیلی افواج نے مقبوضہ مغربی کنارے میں ایک بڑی فوجی کارروائی جاری رکھی ہوئی، جس میں جنین اور تلکریم پناہ گزین کیمپوں کے ساتھ ساتھ دیگر فلسطینی برادریوں کو بھی نشانہ بنایا گیا ہے اور گزشتہ ہفتے سے اب تک دو درجن سے زائد افراد کو شہید کیا جاچکا ہے۔غزہ پر اسرائیل کی جنگ میں 7 اکتوبر 2023 سے اب تک کم از کم 47 ہزار 460 فلسطینی شہید اور ایک لاکھ 11 ہزار سے زائد زخمی ہو چکے ہیں، اس دوران حماس کی زیر قیادت حملوں میں اسرائیل میں کم از کم ایک ہزار 139 افراد ہلاک ہوئے اور 200 سے زیادہ کو یرغمال بنا لیا گیا تھا، جنگ بندی کے معاہدے کے تحت ان یرغمالیوں کی رہائی کا عمل بتدریج جاری ہے۔انٹرنیشنل کمیونٹیز آرگنائزیشن کے مشرق وسطیٰ کے ڈائریکٹر گرشون بسکن نے الجزیرہ کو بتایا ہے کہ یہ واضح ہے کہ گزشتہ جمعرات کو قیدیوں کی رہائی سے حماس نے سبق سیکھا ہے۔گرشون بسکن (جو اسرائیل میں یرغمالیوں کے سابق مذاکرات کار بھی تھے) نے کہا کہ آج دونوں اسرائیلی یرغمالیوں کی منتقلی منظم، پرسکون اور منظم رہی ہے۔ان کا کہنا تھا کہ خان یونس کے علاقے کو شہریوں سے خالی کرا لیا گیا، حماس کے مجاہدین کا علاقے پر مکمل کنٹرول تھا اور رہائی کا کام فوری طور پر مکمل کر لیا گیا۔
یرغمالیوں کی رہائی کا چوتھا مرحلہ
یرغمالیوں کی رہائی کے چوتھے مرحلے میں فلسطینی مزاحمتی تنظیم حماس نے مزید 2 اسرائیلی شہریوں کو رہا کر دیا۔عرب میڈیا رپورٹس کے مطابق یرغمالیوں کی رہائی کے معاہدے کے تحت حماس نے 2 اسرائیلی یرغمالیوں کو خان یونس میں ریڈ کراس کے سپرد کیا۔میڈیا رپورٹس میں بتایا گیا ہے کہ حماس کی جانب سے 2 اسرائیلی یرغمالیوں اوفر کالدرون اور یارڈن بیباس کو رہا کیا گیا جبکہ تیسرے یرغمالی کو معاہدے کے مطابق تیسرے اسرائیلی شہری کو بعد میں رہا کیا جائے گا۔ عرب میڈیاکے مطابق تیسرے اسرائیلی یرغمالی کیتھ سیگل کو غزہ سٹی میں ریڈ کراس کے سپرد کیا جائے گا۔عرب میڈیا کے مطابق 3 اسرائیلی یرغمالیوں کے بدلے 183 فلسطینیوں کو بھی آج ہی رہا کیا جائے گا۔یاد رہے کہ حماس نے معاہدے کے تحت پہلے مرحلے میں 3 اسرائیلی خواتین کو رہا کیا تھا جس کے بدلے میں اسرائیل سے 90 فلسطینیوں کو رہا کیا گیا تھا۔ دوسرے مرحلے میں حماس نے 4 اسرائیلی خواتین کو جبکہ اسرائیلی نے 120 فلسطینیوں کو رہا کیا تھا، تیسرے مرحلے میں حماس نے 5 تھائی خواتین سمیت 8 یرغمالیوں کو رہا کیا گیا۔
