![](https://jadeedbharat.com/wp-content/uploads/2024/06/202406023169744-r4oSmY-750x450.jpeg)
تلنگانہ کی یومِ تاسیس پر کانگریس کی سابق صدر سونیا گاندھی نے عوام کو مبارکباد پیش کی ہے اور ریاست کی تیز رفتار ترقی اور روشن مستقبل کے لیے نیک خواہشات کا اظہار کیا ہے۔ سونیاگاندھی نے یہ باتیں اپنے پہلے سے ریکارڈ شدہ ایک ویڈیو پیغام میں کہی ہیں جو یومِ تاسیس کے موقع پر منعقدہ پروگرام میں نشر کیا گیا۔
واضح رہے کہ تلنگانہ کی حکومت نے سونیاگاندھی کو تقریب میں شرکت کی دعوت دی تھی لیکن وہ خرابی صحت کی وجہ سے شریک نہیں ہو سکیں۔ اپنے پیغام میں انہوں نے کہا کہ تلنگانہ کے عوام نے ایک خوشحال اور ترقی یافتہ تلنگانہ کی تعمیر کی ذمہ داری کانگریس کو سونپی ہے اور یہ اس کا فرض ہے کہ وہ عوام کے تمام خوابوں کو پورا کرے۔
سونیا گاندھی نے کہا کہ آج اس خاص موقع پر میں آپ سب کو یقین دلانا چاہتی ہوں کہ ریونت ریڈی کی قیادت میں تلنگانہ میں کانگریس حکومت اپنی گارنٹیوں کو پورا کرنے میں کوئی کسر نہیں چھوڑے گی۔ انہوں نے تلنگانہ کے ان گنت شہیدوں کو خراج عقیدت پیش کیا جنہوں نے ایک عظیم ریاست کی تشکیل کے لیے اپنی جانیں قربان کیں۔ انہوں نے کہا کہ میں نے 2004 میں کریم نگر میں تلنگانہ کے لوگوں سے وعدہ کیا تھا کہ کانگریس ان کے خوابوں کو پورا کرے گی۔ میرے بیان کے بعد ہماری پارٹی میں اختلافات پیدا ہو گئے اور بہت سے لوگوں نے پارٹی چھوڑ دی تھی۔ مگر آپ کی ہمت اور عزم نے مجھے آپ کے خوابوں کوپورا کرنے کی طاقت اور حوصلہ دیا۔
کانگریس کی سابق صدر نے اپنے پیغام میں مزید کہا کہ گزشتہ 10 سالوں میں تلنگانہ کے عوام نے انہیں بہت عزت اور پیار دیا ہے۔ واضح رہے کہ اس مرکزی تقریب میں وزیر اعلیٰ اے ریونت ریڈی نے قومی پرچم لہرایا اور پولیس دستے کی سلامی لی۔ گزشتہ سال دسمبر میں ریاست میں کانگریس کے اقتدار میں آنے کے بعدحکوت کے لیے یہ پہلا یومِ تاسیس تھا۔
![Follow us on Google News](https://jadeedbharat.com/wp-content/uploads/2024/01/GoogleNews.png)