ہم سیاست کو حکمرانی کا نہیں بلکہ خدمت کا ذریعہ سمجھتے ہیں :سدیش کمار مہتو
جدید بھارت نیوز سروس
رانچی؍ تماڑ:، 3 اکتوبر: حکومت کی غلط پالیسیوں کی وجہ سے نوجوانوں کے لیے بے روزگاری ایک سنگین مسئلہ بن چکی ہے اور اس سے بڑا مسئلہ یہ ہے کہ روزگار فراہم کرنے کے نام پر نوجوانوں کو صرف دھوکہ دیا گیا ہے۔ حکومت عوام کی عزت نہیں کر رہی بلکہ ان کی توہین کر رہی ہے۔ مذکورہ باتیں پارٹی صدر سدیش کمار مہتو نے سلگاڈیہہ انٹر کالج گراؤنڈ میں تماڑ میں منعقدہ تماڑ اسمبلی سطح کی چولہا پرمکھ کانفرنس اور حلف برداری کی تقریب میں کہی۔ اس موقع پر حلقہ اسمبلی کے ہزاروں چولہا سربراہان نے اپنے عہدوں کا حلف اٹھایا۔ تماڑ میں پچھلے پانچ سالوں میں کوئی ترقیاتی کام نہیں ہوا۔ حکومت کو عوام کی کوئی فکر نہیں۔ زرعی علاقہ ہونے کے باوجود حکومت یہاں کے کسانوں کو مناسب آبپاشی فراہم کرنے میں ناکام رہی ہے۔ آج جنگلوں میں رہنے والاہمارا خاندان زمین کے لیز کے لیے احتجاج کرنے پر مجبور ہے لیکن ان کی دیکھ بھال کرنے والاکوئی نہیں۔ جنگلات کو ذریعہ معاش بنانے کی طرف کوئی کام نہیں کیا گیا۔ ہماری تیاری تماڑ اسمبلی کو ترقی کی راہ پر لے جانے اور ہر کھیت کو پانی فراہم کرنے کی ہے۔ حکومت نے ہمارے خاندانوں کو مجبور کیا ہے، ہم انہیں مضبوط کرنا چاہتے ہیں۔ ہم سماجی تانے بانے کو برقرار رکھتے ہوئے ہر خاندان کو یکساں مواقع فراہم کرنے کے لیے کام کر رہے ہیں۔ ہم سیاست کو حکمرانی کا نہیں خدمت کا ذریعہ سمجھتے ہیں۔ عوام کا ہر مسئلہ حل کرنا ہماری سیاسی ذمہ داری ہے۔ اس موقع پر سینئرلیڈر سنگھ رائے ٹوٹی، زپ ممبر پرمیشوری سنڈیلیا، سدھا منڈو، زپ ممبر وجے سنگھ مانکی، رام درلبھ سنگھ منڈا، کیشو چندر مہتو، ہیرالال داس، گنجل اکیر منڈا، رمیش بھگت، اڈکی پرمکھ کرشنا سنگھ منڈا، سدھارتھ ساہو، ہردیو مہتو کے علاوہ دیگر لوگ موجود تھے۔
