امریکہ میں صدارتی انتخاب قریب ہے، اور اس سے عین قبل صدر جو بائڈن مشکل میں پھنس گئے ہیں۔ ’ڈرگ اینڈ گن‘ کیس میں امریکہ کے ڈیلاویئر کی ایک عدالت نے جو بائڈن کے بیٹے ہنٹر بائڈن کو قصوروار قرار دیا ہے۔ ان کی سزا کا اعلان 120 دنوں کے اندر ہو سکتا ہے۔ ہنٹر کو زیادہ سے زیادہ 25 سال قید تک کی سزا ہو سکتی ہے۔

قابل ذکر ہے کہ امریکی صدر بائڈن نے حال ہی میں فرانس دورہ کے دوران میڈیا کے ذریعہ پوچھے گئے ایک سوال کے جواب میں کہا تھا کہ اگر ہنٹر ڈرگ اینڈ گَن ٹرائل میں قصوروار پایا جاتا ہے تو وہ اسے کبھی معاف نہیں کریں گے۔ غور کرنے والی بات یہ ہے کہ یہ امریکی تاریخ میں پہلی بار ہے جب کسی موجودہ صدر کے بیٹے کو قصوروار ٹھہرایا گیا ہے۔

دراصل ہنٹر بائڈن جس گن ٹرائل معاملہ میں قصوروار پائے گئے ہیں وہ 6 سال قدیم ہے۔ ہنٹر پر بندوق لائسنس لینے کی درخواست کے دوران اپنی ڈرگ کی عادت کو چھپانے کا الزام ہے۔ 2018 میں ہنٹر بائڈن نے کولٹ کوبرا ہینڈ گن خریدتے وقت افسران سے کچھ جانکاری چھپائی تھی۔ اس وقت وہ نشے کے عادی تھے اور یہ بات انھوں نے اپنی درخواست میں ظاہر نہیں کی تھی۔ امریکی قانون کے مطابق کسی بھی نشہ کے عادی انسان کو بندوق کا لائسنس نہیں دیا جا سکتا ہے۔

ہنٹر کو مجموعی طور پر تین معاملوں میں قصوروار پایا گیا ہے۔ ان میں 2 معاملوں میں 10-10 سال کی جیل اور ایک میں 5 سال کی جیل ہو سکتی ہے۔ ماہرین کے مطابق سزا کو کم یا زیادہ کرنا جج پر منحصر کرتا ہے۔ نیویارک ٹائمز کی خبر کے مطابق جن اشخاص کا کوئی کریمنل ریکارڈ نہیں ہوتا ہے اور دھوکہ سے خریدے گئے اسلحہ کا استعمال کسی مجرمانہ سرگرمی میں نہیں ہوا ہوتا ہے تو اس کی سزا کم کر دی جاتی ہے۔ وال اسٹریٹ جیل کنسلٹنٹس کے ڈائریکٹر لیری لیون کا کہنا ہے کہ ہنٹر کو 36 مہینوں سے زیادہ کی سزا نہیں ہوگی، اور یہ سزا بھی ان کے جیل میں اچھے سلوک کی صورت میں نصف ہو جائے گی۔

بہرحال، اس کیس کی سماعت کے دوران ہنٹر کی سابق معشوقہ ہیلی نے ان کے خلاف گواہی دی ہے۔ بی بی سی کی ایک رپورٹ کے مطابق ہیلی نے عدالت میں کہا کہ انھوں نے جب ہنٹر بائڈن کی کار کی تلاشی لی تب انھیں وہاں ایک بندوق ملی جسے دیکھ کر وہ ڈر گئی تھیں۔ ہیلی نے عدالت کو یہ بھی بتایا کہ انھوں نے کئی بار ہنٹر کو ڈرگ لیتے ہوئے پکڑا ہے۔ غلط طریقے سے اسلحہ رکھنے کے علاوہ ہنٹر بائڈن پر کیلیفورنیا میں فرضی ٹیکس فائل کرنے، اسلحوں سے متعلق معاملوں کو ختم کرانے کے لیے سودا کرنے کے بھی الزامات ہیں۔

گزشتہ مہینے بھر سے بموں کی دھمکیوں کا ایک سلسلہ سا چل نکلا ہے۔ یہ دھمکی ایئر پورٹ، اسکولوں اور اسپتالوں تک کو ملی رہی اور تفتیش کے بعد غلط ثابت ہوتی ہے۔ ایسی ہی ایک دھمکی چنڈی گڑھ کے مینٹل اسپتال کو ای میل کے ذریعے دی گئی ہے۔ ای میل میں اسپتال میں بم ہونے کی بات کہی گئی جس کے بعد وہاں موجود مریضوں اور عملے میں خوف وہراس پھیل گیا۔ اس دھمکی کے بعد اسپتال کو خالی کرایا گیا اور بم کی تلاش کے لیے سرچ آپریشن کیا گیا لیکن کچھ نہیں ملا۔

نیوز پورٹل ’آج تک‘ کے مطابق چنڈی گڑھ مینٹل اسپتال کے ایک اہلکار نے کہا ہے کہ اسپتال میں بم کی دھمکی کا یہ ای میل دہلی اور جنوبی ہندوستان کے کئی اسپتالوں کو بھی موصول ہوا ہے۔ چنڈی گڑھ پولیس حکام نے بتایا کہ مینٹل اسپتال کے پورے احاطے کی تلاشی لی جا رہی ہے۔ ہر اس جگہ کی جانچ کی گئی جہاں ممکنہ بم پلانٹ کیا جا سکتا ہے لیکن کچھ نہیں ملا۔ میل میں چنڈی گڑھ کے علاوہ دہلی اور رانچی کے مینٹل اسپتالوں میں بھی بم ہونے کی بات کہی گئی ہے۔ پولیس کے مطابق بم ڈفیوزل اسکواڈ اور فائر بریگیڈ کی ٹیمیں موقع پر تعینات کر دی گئی ہیں۔

اسپتال کی ڈپٹی میڈیکل سپرنٹنڈنٹ ڈاکٹر اپراجتا نے بتایا کہ صبح کے وقت سیکٹر 32 میں واقع مینٹل اسپتال میں بم کے بارے میں ایک ای میل موصول ہوئی تھی۔ اس وقت اسپتال میں مریضوں، ان کے اہل خانہ اور عملہ سمیت تقریباً 100 افراد موجود تھے۔ یہ میل ملک کے کئی مینٹل انسٹی ٹیوٹ کو بھیجے گئے تھے۔ اس ای میل میں بتایا گیا ہے کہ آپ کے اسپتال میں بم ہے۔ ہم نے وہ ای میل پولیس کو فارورڈ کر دیا ہے۔ میل میں بھیجنے والے کا نام نظر نہیں آرہا تھا۔ یہ پرسنل ای میل آئی ڈی سے بھیجا گیا میل تھا۔ ڈاکٹر اپرجتا نے بتایا کہ چنڈی گڑھ مینٹل اسپتال کے علاوہ دہلی کے کچھ اسپتالوں اور جھارکھنڈ کے رانچی میں واقع سی آئی پی (سینٹرل انسٹی ٹیوٹ آف سائیکٹری) کے نام میل میں شامل تھے۔ میل میں لکھا تھا کہ آپ کے اسپتال میں بم ہے اور سب مر یں گے۔

لوک سبھا انتخاب 2024 میں بی جے پی کو اکثریت حاصل نہیں ہوئی، اور اس نے این ڈی اے میں شامل پارٹیوں کی مدد سے حکومت تشکیل دی۔ پی ایم مودی نے تیسری مرتبہ وزیر اعظم عہدہ کا حلف لے لیا، لیکن اس بات سے کئی لوگ خوش ہیں کہ بی جے پی اپنے دَم پر حکومت تشکیل دینے میں ناکام ہو گئی۔ ایسے لوگوں میں مشہور و معروف اداکار نصیر الدین شاہ بھی شامل ہیں۔

نصیر الدین شاہ نے لوک سبھا انتخاب 2024 سے متعلق اپنی بات رکھتے ہوئے کہا ہے کہ ’’پی ایم مودی یہ بات مان چکے تھے کہ وہ تاحیات وزیر اعظم رہنے والے ہیں۔ اب پی ایم مودی کے لیے اتحاد والی حکومت چلانا ایک تلخ دوا کھانے جیسا ہوگا۔‘‘ نصیر الدین شاہ نے مزید کہا کہ جب انھیں پتہ چلا کہ بی جے پی کو اپنے دَم پر لوک سبھا انتخاب میں اکثریت نہیں ملی اور گزشتہ دو انتخابات کے مقابلے اس نے اچھی کارکردگی نہیں کی تو انھوں نے راحت کی سانس لی تھی۔ اس خبر سے وہ بہت خوش ہوئے تھے۔

یہ باتیں نصیر الدین شاہ نے ’دی وائر‘ کو دیے گئے ایک انٹرویو کے دوران کہیں۔ انھوں نے پی ایم مودی کے بارے میں اپنے نظریات سامنے رکھتے ہوئے کہا کہ وہ گزشتہ کچھ سالوں سے لگاتار کم سمجھداری کی باتیں کر رہے ہیں۔ اگر پی ایم مودی اس بات کو مانتے ہیں کہ انھیں بھگوان نے زمین پر بھیجا ہے، یا پھر وہ خود ہی بھگوان ہیں تو عوام کو اس بات سے خوفزدہ ہونا چاہیے۔

سینئر صحافی کرن تھاپر سے ہوئی اس بات چیت کے دوران نصیر الدین شاہ نے کہا کہ اگر پی ایم مودی مسلم ٹوپی پہن لیں تو اس سے اچھا پیغام جائے گا۔ اس کی وجہ بتاتے ہوئے انھوں نے کہا کہ اس سے مسلمانوں کے درمیان ایک پیغام جائے گا کہ مودی مسلمانوں سے نفرت نہیں کرتے ہیں۔ نصیر الدین شاہ یہ بھی کہتے ہیں کہ اگر پی ایم مودی مسلمانوں کو ایسا پیغام دیں گے تو یہ ان کے لیے بہت مددگار ثابت ہوگا۔

راشٹریہ سویم سنگھ (آر ایس ایس) کے ترجمان ’آرگنائزر‘ نے لوک سبھا انتخابات میں اپنے بل بوتے پر اکثریت حاصل کرنے میں کامیاب نہ ہونے پر بی جے پی پر تنقید کی ہے۔ سنگھ نے لکھا ہے کہ ایسے نتائج بی جے پی لیڈروں اور کارکنوں کی زیادہ خود اعتمادی کی وجہ سے آئے ہیں۔ آرگنائزر میں شائع مضمون میں رتن شاردا نے کہا ہے کہ عوام اور عام لوگوں کی آواز سننے کے بجائے بی جے پی کارکن وزیر اعظم نریندر مودی کی مدح سرائی کی چمک سے لطف اندوز ہو رہے تھے۔

مضمون کے آغاز میں سنگھ نے لکھا ہے کہ بھلے ہی مرکز میں تیسری بار مودی حکومت بنی ہے لیکن اس بار بی جے پی اپنے بل بوتے پر مکمل اکثریت کے ساتھ حکومت بنانے میں ناکام رہی ہے۔ مضمون میں کہا گیا ہے کہ اتر پردیش سمیت کئی ریاستوں میں پارٹی کی کارکردگی انتہائی خراب اور مایوس کن رہی۔ سنگھ نے کہا کہ انتخابی نتائج بی جے پی کے لیے زمینی حقیقت کو سمجھنے اور غور و خوض کرنے کا اشارہ ہیں۔

آر ایس ایس نے کہا ہے کہ بی جے پی لیڈر انتخابی حمایت کے لیے ‘سوم سیوکوں’ تک پہنچے ہی نہیں۔ یاد رہے کہ سنگھ اپنے کارکنوں کو سوم سیوک کہتا ہے۔ اس نے کہا ہے کہ بی جے پی نے ان کارکنوں پر کوئی توجہ نہیں دی جو نچلی سطح پر کام کر رہے تھے۔ سنگھ نے انتہائی تنقیدی انداز میں کہا کہ بی جے پی نے ان کارکنوں پر اعتماد کا اظہار کیا جو ‘سیلفیوں’ کی مدد سے مہم چلا رہے تھے۔ سنگھ کے رکن رتن شاردا مضمون میں مزید لکھتے ہیں کہ انتخابی نتائج بی جے پی کو آئینہ دکھانے والے ہیں۔

سنگھ نے مہاراشٹر کو لے کر سخت تبصرہ کیا ہے۔ رتن شاردا نے مضمون میں لکھا ہے کہ بی جے پی مہاراشٹر کی سیاست میں بہت زیادہ سرگرم ہو گئی اور وہاں غیر ضروری سیاست کی گئی۔ اجیت پوار دھڑے کی این سی پی کے مہاراشٹر میں بی جے پی کے ساتھ ہاتھ ملانے کی وجہ سے بی جے پی کارکنوں میں غصہ ہے، جسے پارٹی نے تسلیم نہیں کیا۔ رتن شاردا کا کہنا ہے کہ این سی پی کے ساتھ آنے کی وجہ سے مہاراشٹر میں بی جے پی کی برانڈ ویلیو میں نمایاں کمی آئی ہے۔

رتن شاردا نے اگرچہ کسی لیڈر کا نام نہیں لیا لیکن لکھا کہ ایسے کئی سابق کانگریسی لیڈروں کو بی جے پی میں شامل کر لیا گیا، جنہوں نے بھگوا دہشت گردی کا نعرہ لگایا تھا۔ شاردا لکھتے ہیں کہ بی جے پی میں ایسے کئی لیڈر شامل تھے جنہوں نے 26-11 کے ممبئی حملوں کو آر ایس ایس کی سازش قرار دیا تھا۔

خیال رہے کہ مہاراشٹر کے حالیہ انتخابات میں بی جے پی کی کارکردگی سب سے خراب رہی ہے۔ 2019 میں بی جے پی نے 48 میں سے 23 سیٹیں جیتی تھیں لیکن اس بار وہ صرف 9 سیٹیں جیت سکی۔ اس کے علاوہ شندے دھڑے کی شیوسینا 7 اور اجیت پوار کی این سی پی صرف ایک سیٹ ہی جیت پائی۔

سنگھ نے مضمون میں نشاندہی کی گئی ہے کہ بی جے پی ووٹروں تک صحیح طریقے سے پہنچنے میں ناکام رہی ہے۔ رتن شاردا مضمون میں مزید لکھتے ہیں کہ پارٹی کے ایجنڈے کی وضاحت کرنا، پارٹی لٹریچر اور ووٹر کارڈ تقسیم کرنا پارٹی کی ذمہ داری ہے۔

رتن شاردا لکھتے ہیں کہ بی جے پی کارکنان اور پارٹی کے بہت سے لیڈر ٹھیک سے نہیں سمجھ سکے کہ ’400 پار‘ کا نعرہ دے کر مودی نے کارکنوں اور لیڈروں کے لیے ایک ہدف مقرر کیا تھا اور اپوزیشن کو بڑا چیلنج دیا تھا۔ لیکن اہداف محنت سے حاصل ہوتے ہیں نہ کہ سیلفی لینے اور سوشل میڈیا پر پوسٹ کرنے سے۔ انہوں نے لکھا کہ ان انتخابی نتائج سے اور بھی بہت سے سبق ہیں جن پر غور کرنے کی ضرورت ہے۔

رتن شاردا نے یہ وضاحت بھی کی ہے کہ سنگھ بی جے پی کے لیے کام نہیں کرتا، یہ بی جے پی کے لیے فیلڈ فورس نہیں ہے۔ بی جے پی دنیا کی سب سے بڑی سیاسی جماعت ہے اور اس کے اپنے کارکنوں کی فوج ہے۔ ایسے میں پارٹی کے ایجنڈے کو عوام تک پہنچانا اور ووٹروں کی مدد کرنا ان کا کام ہے۔ شاردا نے یاد دلایا کہ 1973 سے 1977 کے عرصے کے علاوہ آر ایس ایس نے کبھی بھی براہ راست مداخلت نہیں کی اور نہ ہی کسی سیاست میں حصہ لیا۔ انہوں نے کہا کہ 2014 میں سنگھ نے 100 فیصد ووٹنگ کا مطالبہ کیا تھا، یہی وجہ ہے کہ اس دوران بڑی تعداد میں ووٹروں نے ووٹ ڈالے تھے اور اقتدار کی تبدیلی ہوئی تھی۔ اس بار بھی سنگھ نے محلوں، سوسائٹیوں اور دفاتر کی سطح پر چھوٹی چھوٹی میٹنگیں کیں اور لوگوں کو ووٹ ڈالنے کی ترغیب دی۔ اس کے علاوہ، سنگھ نے قوم کی تعمیر میں حصہ لینے کے لیے بھی لوگوں کو بیدار کیا۔ انہوں نے لکھا ہے کہ ایسی 1,20,000 میٹنگیں صرف دہلی میں ہوئیں۔

رتن شاردا نے لکھا ہے کہ اس کے علاوہ سوم سیوکوں نے انتخابی کاموں میں بی جے پی کارکنوں کی مدد بھی کی جس میں مقامی لیڈروں تک پہنچنا بھی شامل تھا۔ لیکن یہ کام بڑے پیمانے پر نہیں ہوا۔ انہوں نے لکھا ہے کہ بی جے پی کارکن ‘آئے گا تو مودی ہی‘ اور ’اب کی بار 400 پار‘ کے نعروں میں الجھے رہے۔ پرانے اور سرشار کارکنوں کو نظر انداز کیا گیا اور جب خود بی جے پی کارکن ہی سنگھ کے سوم سیوکوں کے پاس نہیں جا رہے تھے تو پھر سوم سیوک بھی ان کے پاس کیوں جاتے؟

مضمون میں امیدواروں کے انتخاب کے حوالے سے بھی سوالات اٹھائے گئے ہیں۔ رتن شاردا لکھتے ہیں کہ یہ مفروضہ کہ مودی اکیلے تمام 543 سیٹوں پر الیکشن لڑ رہے ہیں، انتخابی شکست کی بنیاد بن گئی۔ بی جے پی نے پارٹی میں پرانے اور جیتنے والے امیدواروں کے بجائے نئے لوگوں کو ٹکٹ دیا جس سے کافی نقصان ہوا۔ ایک اندازے کے مطابق تقریباً 25 فیصد امیدوار ایسے تھے جنہوں نے دوسری پارٹیاں چھوڑ دی تھیں۔ ہماچل میں بغاوت کا سامنا کرنے والی بی جے پی کے لیے اس طرح کا موقف اپنانا حیران کن تھا۔

سنگھ نے لکھا ہے کہ جب لیڈر عوام کی پہنچ سے باہر تھے، کارکنوں کو ان سے ملنے کا وقت نہیں مل رہا تھا اور وہ صرف فیس بک اور ٹوئٹر پر انگلیاں چلا رہے تھے، پھر وہ الیکشن کیسے جیت سکتے تھے۔