تو جنگ ختم ہو سکتی ہے: اسرائیلی وزیرِ اعظم کا جنرل اسمبلی سے خطاب

نیو یارک 28 ستمبر:(ایجنسی) اسرائیل کے وزیرِ اعظم بن یامین نیتن یاہو نے کہا ہے کہ سات اکتوبر کے حماس کے حملے کے بعد سے اسرائیل لبنان سمیت کئی محاذوں پر اپنے دفاع کے لیے مجبور ہوا ہے۔جمعے کو اقوامِ متحدہ کی جنرل اسمبلی اجلاس سے خطاب میں نیتن یاہو نے کہا کہ اس سال ان کا یہاں آنے کا ارادہ نہیں تھا۔ ان کا ملک جنگ میں ہے اور اپنی بقا کے لیے لڑ رہا ہے۔اسرائیلی وزیرِ اعظم کے خطاب کے دوران پاکستان سمیت بعض ممالک کی جانب سے واک آؤٹ کیا گیا۔نیتن یاہو نے کہا کہ اسرائیل امن کا خواہاں ہے۔ لیکن ہمیں دشمنوں کا سامنا ہے جو ہماری تباہی چاہتے ہیں اور ہمیں ان “وحشی قاتلوں” سے اپنا دفاع کرنا چاہیے۔اسرائیلی وزیرِ اعظم نے کہا کہ سعودی عرب اور اسرائیل کے درمیان تعلقات معمول پر آنے کا معاہدہ بہت قریب نظر آرہا تھا کہ پھر سات اکتوبر آ گیا۔ “غزہ سے ایران کے حمایت یافتہ ہزاروں حماس کے دہشت گرد ٹرکوں، موٹرسائیکلوں پر اسرائیل میں گھس آئے۔ اور انہوں نے ناقابلِ تصور مظالم کیے۔”نیتن یاہو نے کہا کہ حماس نے اس حملے میں 1200 افراد کو ہلاک اور 251 کو یرغمال بنایا جن میں سے 154 یرغمالوں کو واپس اسرائیل لایا جا چکا ہے۔ ان میں سے 117 کو زندہ واپس لایا گیا ہے۔ انہوں نے کہا کہ ہم اس وقت تک آرام نہیں کریں گے جب تک تمام یرغمالوں کو واپس گھر نہیں لے آتے۔واضح رہے کہ اسرائیل اور حماس کا حالیہ تنازع سات اکتوبر کو حماس کے اسرائیل پر دہشت گرد حملے کے بعد شروع ہوا تھا جس میں بارہ سو افراد ہلاک ہوئے تھے۔ اسرائیل کی جوابی کارروائیوں میں حماس کے زیرِ انتظام غزہ کے محکمۂ صحت کے مطابق اب تک چالیس ہزار سے زائد فلسطینی ہلاک ہو چکے ہیں ۔نیتن یاہو نے کہا کہ ان کا تہران کے ‘ظالموں کے لیے ایک پیغام ہے۔ “اگر تم نے ہم پر حملہ کیا تو ہم تم پر حملہ کریں گے۔” اور ایران میں کوئی ایسی جگہ نہیں جہاں تک اسرائیل نہ پہنچ سکے۔اسرائیلی وزیرِ اعظم کا کہنا تھا کہ ایران کو جوہری ہتھیار بنانے سے روکنے کے لیے اسرائیل اپنی پوری قوت استعمال کرے گا۔ سلامتی کونسل سے بھی مطالبہ کرتے ہیں کہ ایران کو جوہری ہتھیار بنانے سے روکنے کے لیے اس پر پابندیاں عائد کرے۔نیتن یاہو نے کہا کہ وہ اس اسمبلی اور یہاں سے باہر دنیا کو یہ پیغام دینا چاہتے ہیں کہ “ہم جیت رہے ہیں۔”اسرائیلی وزیرِ اعظم نے کہا کہ یہ جنگ اب ختم ہو سکتی ہے۔ بس حماس ہتھیار ڈال دے اور تمام یرغمالوں کو رہا کر دے۔ لیکن اگر وہ ایسا نہیں کرتے تو ہم فتح حاصل کرنے تک لڑیں گے۔ اس کا کوئی متبادل نہیں ہے۔

واشنگٹن،28ستمبر (ہ س) لبنانی دارالحکومت کے علاقے جنوبی الضاحیہ پر اسرائیلی حملے کے بعد، امریکی وزیر خارجہ بلنکن نے جمعہ کو کہا کہ یہ لمحہ مشرق وسطیٰ اور دنیا کے لیے نازک ہے۔ امریکہ اور فرانس نے اسرائیل اور لبنانی حزب اللہ کے درمیان جنگ بندی کا مطالبہ کیا تو اسرائیل کی طرف سے جنگ بندی کی تجویز کو نظر انداز کر دیا گیا۔بلنکن نے اقوام متحدہ میں سفارتی اجلاسوں کے ایک ہفتے کے اختتام پر ایک پریس کانفرنس میں کہا کہ سب سے اہم چیز جو سفارت کاری کے ذریعے کی جانی چاہیے وہ یہ ہے کہ پہلے دونوں سمتوں میں آگ کو روکنے کی کوشش کی جائے اور پھر وقت کا استعمال کیا جائے۔ ایک جنگ بندی ہمیں ایک وسیع تر سفارت کاری کرکے معاہدے تک پہنچنے کے امکان پر بات کرنے کی اجازت دیتی ہے۔ انہوں نے مزید کہا کہ سفارتی راستہ اس وقت مشکل معلوم ہو سکتا ہے لیکن یہ اب بھی موجود ہیاور ہماری رائے میں یہ ضروری ہے۔ ہم پوری شدت سے اپنا کام جاری رکھیں گے۔ انہوں نے یہ بھی کہا کہ مشرق وسطیٰ میں بڑھتے ہوئے تشدد کے درمیان اگر ہمارے مفادات پر حملہ ہوا تو واشنگٹن تمام ضروری اقدامات کرے گا۔ انہوں نے کہا کہ امریکہ کسی بھی فریق کے خلاف تمام اقدامات اٹھائے گا جو صورت حال کا فائدہ اٹھاتے ہوئے امریکی اہلکاروں اور خطے میں امریکی مفادات کو نشانہ بنائے گا۔دوسری طرف امریکی وزیر دفاع لائیڈ آسٹن نے کہا کہ لبنان میں ایک جامع جنگ سے گریز کیا جانا چاہیے۔ اقوام متحدہ کے سیکرٹری جنرل نے جمعہ کے روز اپنی تشویش کا اظہار کیا اور کہا کہ غزہ میں جنگ کی وجہ سے پیدا ہونے والی “صدماتی لہر” سے پورے مشرق وسطیٰ کے “کھائی میں گرنے” کا خطرہ ہے۔ انہوں نے فرانسیسی امریکی جنگ بندی کی تجویز کی حمایت کا اظہار کیا۔گوٹیرس نے غزہ کی صورتحال پر اقوام متحدہ کی سلامتی کونسل کے اجلاس کے دوران کہا کہ غزہ میں غیر معمولی موت اور تباہی کی وجہ سے ہونے والی صدمے کی لہر سے اب پورے خطے کے کھائی میں گرنے کا خطرہ ہے۔ انہوں نے کہا کہ لبنان میں جنگ ایک نئی شدت کا باعث بن سکتی ہے جس میں بیرونی قوتیں شامل ہیں۔ بدھ کے روز کئی یورپی اور عرب ممالک کے علاوہ امریکہ اور فرانس نے بھی اسرائیل اور حزب اللہ کے درمیان 21 دن کے لیے عارضی جنگ بندی کا مطالبہ کیا تھا تاکہ حالات قابو سے باہر ہونے سے بچا جا سکے۔ لیکن اسرائیلی وزیر اعظم نیتن یاہو نے جنگ بندی کے خاتمے کی امیدوں پر پانی پھیر دیا جب انہوں نے جمعہ کو اقوام متحدہ میں اعلان کیا کہ لبنان میں اسرائیلی کارروائیاں ہمارے تمام مقاصد کے حصول تک جاری رہیں گی۔

واشنگٹن، 28 ستمبر (یو این آئی) امریکہ میں طاقتور سمندری طوفان ہیلن کی وجہ سے تقریباً 26 لوگوں کی موت ہو گئی ہے۔اے بی سی نیوز کی رپورٹ کے مطابق ریاست جارجیا میں 11، فلوریڈا میں سات، جنوبی کیرولائنا میں چھ اور شمالی کیرولائنا میں ایک شخص ہلاک ہوا ہے۔وائٹ ہاؤس کے ایک اہلکار نے بتایا کہ امریکی صدر جوبائیڈن کو سمندری طوفان ہیلن کے تازہ ترین اثرات سے آگاہ کیا گیا۔واضح رہے کہ جمعرات کی رات دیر گئے امریکہ سے ٹکرانے کے بعد سمندری طوفان ہیلن کمزور ہو کر ٹراپیکل طوفان میں تبدیل ہو گیا۔

اقوام متحدہ/نئی دہلی، 28 ستمبر (یو این آئی) ہندوستان نے اقوام متحدہ میں پاکستان پر کڑی تنقید کرتے ہوئے دنیا کو اس کے دہشت گردی کو فروغ دینے، القاعدہ کے سربراہ اسامہ بن لادن کو پناہ دینے اور اس وقت کے مشرقی پاکستان میں لاکھوں بنگالیوں کے قتل عام اور اقلیتوں پرظلم کرنے کے ساتھ ہی سرحد پار دہشت گردانہ حملوں کی یاد دلائی۔ اقوام متحدہ کی جنرل اسمبلی میں ہندوستانی نوجوان سفارت کار بھاویکا منگلانندن نے ہندوستان کو نشانہ بنانے والی تقریر کیلئے پاکستان کے وزیر اعظم شہباز شریف پرپر حملہ بولا جس میں انہوں نے مسئلہ کشمیر اٹھایا اور ان پر “اسلامو فوبیا” کا الزام لگایا تھا۔ انہوں نے دنیا کو پاکستان کی جانب سے ہندوستان کے خلاف سرحد پار دہشت گردی کو ہتھیار کے طور پر استعمال کرنے، 2001 میں پاکستان میں قائم جیش محمد کے پارلیمنٹ پر حملہ، 2008 میں پاکستان میں مقیم لشکر طیبہ کے ذریعہ ممبئی حملوں اور ہندوستان پر دیگر دہشت گردانہ حملے کی یاد دلائی۔بھاویکا منگلانندن نے کہا، ’’ہندوستان کے خلاف دہشت گردانہ حملوں کی فہرست طویل ہے۔ اس طرح کے ملک کے لیے کہیں بھی تشدد کے بارے میں بات کرنا بدترین منافقت میں سے ایک ہے۔انہوں نے کہا کہ انتخابی دھاندلی کی تاریخ رکھنے والے ملک کے لیے سیاسی آپشنز کی بات کرنا اور بھی غیر معمولی بات ہے، وہ بھی جمہوریت میں، جب کہ پاکستان کے سابق وزیراعظم عمران خان کی پارٹی پاکستان تحریک انصاف مسلسل یہ الزام لگاتی رہی ہے کہ پاکستان میں فروری 2024 کے عام انتخابات میں ان کی پارٹی کو باہر رکھنے کے لیے دھاندلی کی گئی۔محترمہ منگلانندن نے کہا، ’’اصل سچائی یہ ہے کہ پاکستان کو ہماری سرزمین کا لالچ ہے اور درحقیقت ہندوستان کے ناقابلِ تقسیم اور اٹوٹ حصے جموں و کشمیر میں انتخابات کو متاثر کرنے کے لیے مسلسل دہشت گردی کا استعمال کیا ہے۔ دہشت گردی کے ساتھ کوئی سمجھوتہ نہیں ہو سکتا۔انہوں نے کہا، ’’یہ مضحکہ خیز ہے کہ ایک ایسی قوم جس نے 1971 میں نسل کشی کی اور ایک قوم جو اپنی اقلیتوں پر ظلم کرتی ہے، وہ اب بھی عدم رواداری اور خوف کے بارے میں بات کرنے کی جرات کررہی ہے۔ دنیا خود دیکھ سکتی ہے کہ پاکستان اصل میں کیا ہے۔
انہوں نے کہا کہ ہم ایک ایسے ملک کی بات کر رہے ہیں جس نے اسامہ بن لادن کی طویل عرصے تک میزبانی کی۔ ایک ایسا ملک جس کی انگلیوں کے نشان دنیا بھر میں ہونے والے بہت سے دہشت گردی کے واقعات پر ہیں، ایک ایسا ملک جس کی پالیسیاں کئی معاشروں کی باقیات کو اپنا مسکن بنانے کے لیے راغب کرتی ہیں۔ شاید اس میں کوئی تعجب کی بات نہیں ہونی چاہئے کہ وہاں کے وزیر اعظم اس مقدس ہال میں اس طرح کی تقریر کریں گے۔
پھر بھی ہمیں یہ واضح کرنا چاہیے کہ ان کے الفاظ ہم سب کے لیے کتنے ناقابل قبول ہیں۔ ہم جانتے ہیں کہ پاکستان سچ کا مقابلہ مزید جھوٹ سے کرنا چاہے گا۔ انہوں نے زور دے کر کہا کہ تکرار سے کچھ نہیں بدلے گا اور ہمارا موقف واضح ہے اور اسے دہرانے کی ضرورت نہیں ہے۔

داخلی پروازوں پر پابندی، بین الاقوامی پروازوں کا رخ بھارت کی جانب موڑ دیا گیا

کاٹھمنڈو، 28 ستمبر (ہ س)۔ نیپال میں گزشتہ 24 گھنٹوں سے جاری موسلادھار بارش کی وجہ سے ملک بھر میں نظام زندگی درہم برہم ہو گیا ہے۔ بارش کے باعث ملک بھر کے ہوائی اڈے بند کر دیے گئے ہیں۔کاٹھمنڈو سے داخلی پروازیں جمعہ کی رات سے روک دی گئی ہیں، جب کہ بین الاقوامی پروازوں کو بھارت کے مختلف ہوائی اڈوں کی طرف موڑ دیا گیا ہے۔نیپال میں مسلسل طوفانی بارشوں کی وجہ سے حکومت نے کاٹھمنڈو کے تریبھون بین الاقوامی ہوائی اڈے سے داخلی پروازوں پر پابندی لگا دی ہے۔ صبح سے تین بین الاقوامی پروازیں اس ہوائی اڈے پر ہی اتر سکیں۔ بارش کی وجہ سے حد نگاہ کم ہونے کی وجہ سے طیاروں کی ٹیک آف اور لینڈنگ میں خلل پڑ رہا ہے۔محکمہ شہری ہوا بازی کے جنرل منیجر پردیپ ادھیکاری نے کہا کہ کاٹھمنڈو سمیت ملک بھر کے تمام ہوائی اڈوں کو اگلے نوٹس تک بند رکھنے کا حکم دیا گیا ہے۔ کاٹھمنڈو سے داخلی پروازوں پر پابندی لگا دی گئی ہے۔ انہوں نے کہا کہ جمعہ کے روز کئی بین الاقوامی پروازوں کو ہندوستان کے لکھنؤ، کولکاتہ اور وارانسی کی طرف موڑ دیا گیا تھا۔ ہفتہ کو بھی صبح سے موسلادھار بارش کی وجہ سے بیشتر ایئر لائنز کا رخ بھارت کی طرف موڑ دیا گیا ہے۔ جیسے جیسے بارش وقفے وقفے سے کم ہوئی اور بصارت میں بہتری آئی، صرف تین بین الاقوامی ایئر لائنز کو دوپہر ایک بجے تک لینڈنگ کی اجازت ملی۔ جنرل منیجر افسر کے مطابق دہلی، ممبئی اور بنگلورو سے آنے والے طیاروں کو وہاں روک دیا گیا ہے۔ اس کے علاوہ چین کے بیجنگ، سیچوان، لہاسا اور گوانگ زو سے آنے والے طیاروں کا رخ چین کے تائیفو کی طرف موڑ دیا گیا ہے۔ اس کے علاوہ سنگاپور، ملائیشیا، جاپان، کوریا، ترکی، دبئی، قطر اور ابوظہبی سے آنے والے طیاروں کو ہندوستان کے مختلف ہوائی اڈوں کی طرف موڑ دیا گیا ہے۔