مکمل تعاون فراہم کرانے کی یقین دہائی کرائی

نئی دہلی، 15 دسمبر ۔ ایم این این۔ وزیر خارجہ ایس جے شنکر نے پیر کو اپنے آسٹریلیائی ہم منصب پینی وونگ سے بات کی اور سڈنی کے بوندی بیچ دہشت گردانہ حملے پر ہندوستان کی تعزیت کا اظہار کیا، جس میں 15 بے گناہ لوگ مارے گئے تھے۔ایکس پر ایک پوسٹ میں وزیر خارجہ جئے شنکر نے کہا، ابھی ابھی آسٹریلیا کے وزیر خارجہ پینی وونگ سے بات کی ہے۔ بوندی بیچ دہشت گردانہ حملے کے بارے میں اپنی گہری تعزیت کا اظہار کیا اور اپنی مکمل حمایت کی پیشکش کی۔”پولیس کے مطابق، پاکستانی نژاد باپ بیٹے کی جوڑی، 50 سالہ ساجد اکرم اور 24 سالہ نوید اکرم نے اتوار کو بونڈی بیچ پر یہودیوں کے تہوار کے پہلے دن کی خوشی میں منعقد ہونے والے چانوکہ بائی دی سی تقریب میں فائرنگ کی۔اس حملے کے نتیجے میں بندوق بردار ساجد سمیت 16 افراد ہلاک ہوئے تھے۔ پولیس نے بتایا کہ سب سے کم عمر 10 سالہ لڑکی تھی جو بعد میں بچوں کے ہسپتال میں دم توڑ گئی، جب کہ سب سے بوڑھے کی عمر 87 سال تھی۔حملے کے دوران پولیس کی فائرنگ سے ساجد ہلاک ہو گیا، جبکہ دوسرا حملہ آور، اس کا 24 سالہ بیٹا نوید اکرم زخمی ہو گیا اور اس وقت ہسپتال میں زیر علاج ہے۔اس حملے کو اب آسٹریلیا میں تقریباً تین دہائیوں میں سب سے مہلک اجتماعی فائرنگ کے طور پر بیان کیا جا رہا ہے، ایک ایسے ملک میں جو اپنے سخت بندوقوں کے کنٹرول کے قوانین کے لیے جانا جاتا ہے۔اس سے قبل اتوار کو وزیر اعظم نریندر مودی نے بھی یہودی برادری کو نشانہ بنانے والے دہشت گردانہ حملے کی مذمت کی اور متاثرین کے اہل خانہ سے تعزیت کی۔انہوں نے دہشت گردی کی تمام شکلوں اور مظاہر کے خلاف جنگ میں ہندوستان کی حمایت کا بھی اظہار کیا۔ انہوں نے سوشل میڈیا پلیٹ فارم پر لکھا کہ آسٹریلیا کے بونڈی بیچ پر آج کیے گئے خوفناک دہشت گردانہ حملے کی سخت مذمت کرتے ہیں، جس میں یہودیوں کے تہوار ہنوکا کے پہلے دن منانے والے لوگوں کو نشانہ بنایا گیا۔ ہندوستان کے لوگوں کی طرف سے، میں اپنے پیاروں کو کھونے والے خاندانوں سے دلی تعزیت پیش کرتا ہوں۔ہم غم کی اس گھڑی میں آسٹریلیا کے لوگوں کے ساتھ یکجہتی کے ساتھ کھڑے ہیں۔ ہندوستان دہشت گردی کے خلاف صفر رواداری رکھتا ہے اور دہشت گردی کی تمام شکلوں اور مظاہر کے خلاف جنگ کی حمایت کرتا ہے۔

پر حکومت کارروائی کرے گی: نائیڈو

نئی دہلی، 15 دسمبر (یو این آئی)شہری ہوا بازی کے وزیر رام موہن نائیڈو نے پیر کے روز کہا کہ تہواروں کے مواقع پر یا کسی اور وجہ سے مستقبل میں جب بھی ہوائی جہازوں کے کرایوں میں ناجائز اضافہ ہوگا، حکومت اس پر کارروائی کرے گی۔مسٹر نائیڈو نے راجیہ سبھا میں انڈیگو بحران کے دوران کرایوں کی زیادہ سے زیادہ حد سے متعلق پوچھے گئے ایک ضمنی سوال کے جواب میں کہا کہ انڈیگو بحران کے وقت لوگوں کو کافی مشکلات کا سامنا کرنا پڑا تھا۔ اس دوران ہندوستانی ہوا بازی کے شعبے میں صلاحیت بہت کم ہو گئی تھی۔ انڈیگو ایک بڑی ایئرلائن ہے اور اس نے بڑی تعداد میں پروازیں منسوخ کیں، جس کے نتیجے میں دستیاب نشستوں کی تعداد کم ہو گئی۔وزیر موصوف نے کہا کہ ’’اس کا براہِ راست اثر یہی ہونا تھا کہ ہوائی کرایوں میں اضافہ ہوتا، اسی لیے ہم نے کرایوں کی زیادہ سے زیادہ حد مقرر کی تھی۔ دیگر مواقع پر بھی جب کبھی ہوائی کرایے بڑھتے ہیں تو وزارت اس پر قریبی نظر رکھ رہی ہے۔ جب بھی ایسی کوئی صورتحال پیدا ہوگی، وزارت کارروائی کرے گی۔”انہوں نے کہا کہ اونم اور دیگر تہواروں کے موقعوں پر بھی کرایوں میں اضافہ ہوتا ہے۔ شمالی ہندوستان میں دیوالی کے دوران بھی یہی صورتحال رہتی ہے۔ کمبھ میلے کے دوران، پہلگام حملے کے بعد اور کووِڈ-19 کے زمانے میں بھی حکومت نے ہوائی کرایوں کی زیادہ سے زیادہ حد مقرر کی تھی۔ایک اور ضمنی سوال کے جواب میں مسٹر نائیڈو نے کہا کہ حکومت نے نہ صرف گھریلو بلکہ بین الاقوامی روٹس پر بھی کرایوں کی نگرانی شروع کر دی ہے۔ انہوں نے کہا کہ ’’ڈی جی سی اے میں ٹیرف مانیٹرنگ یونٹ کو مزید مضبوط کیا گیا ہے اور تمام روٹس پر ہم نگرانی کر رہے ہیں۔ بین الاقوامی روٹس کی بھی اب نگرانی کی جا رہی ہے۔ ہم ایئرلائنز پر بھی دباؤ ڈالنا چاہتے ہیں تاکہ موقع پرستی کی وجہ سے کبھی کبھار جو ناجائز کرایوں کی صورتحال پیدا ہو جاتی ہے، وہ نہ بنے۔”اس سے پہلے انہوں نے کہا کہ ہوائی کرایہ ایک غیر منظم (نان ریگولیٹڈ)شعبہ ہے، اس لیے جب طلب زیادہ ہوتی ہے تو کرایے بڑھ جاتے ہیں۔

نئی دہلی، 15 دسمبر (یو این آئی) کانگریس کی جنرل سکریٹری اور لوک سبھا میں پارٹی کی رکن پریانکا گاندھی واڈرا نے کہا ہے کہ حکومت کے وزراء پارلیمنٹ کی کارروائی میں خلل ڈال رہے ہیں اور اس سے ظاہر ہوتا ہے کہ حکومت خود پارلیمنٹ کو نہیں چلانا چاہتی ہے۔پیر کے روز پارلیمنٹ ہاؤس کے احاطے میں نامہ نگاروں سے بات کرتے ہوئے محترمہ واڈرا نے کہا کہ ’’پارلیمانی امور کے وزیر کرن رجیجو نے وقفہ سوالات میں رکاوٹ پیدا کی۔ جیسے ہی ایوان کی کارروائی شروع ہوئی انہوں نے کارروائی میں خلل ڈالنا شروع کر دیا، جس سے ہنگامہ پیدا ہوا اور ایوان کو ملتوی کر دیا گیا۔ اس سے ظاہر ہوتا ہے کہ حکومت کی نیت ایوان کو چلانے کی نہیں ہے۔‘‘انہوں نے کہا کہ ’’مودی حکومت خود پارلیمانی اجلاس کو متاثر کر رہی ہے۔ مجھے لگتا ہے کہ مودی حکومت پارلیمنٹ چلانا ہی نہیں چاہتی ہے۔ ہم نے پارلیمنٹ میں آلودگی پر بحث کا مطالبہ کیا تھا لیکن وہ بحث بھی نہیں ہو رہی ہے۔‘‘قابل ذکر ہے کہ پارلیمنٹ کی کارروائی شروع ہوتے ہی حکمراں پارٹی کے ارکان نے کانگریس کو نشانہ بناتے ہوئے کہا کہ اتوار کے روز رام لیلا میدان میں منعقدہ ریلی میں وزیر اعظم نریندر مودی کے لیے نازیبا الفاظ استعمال کیے گئے اور اس کے لیے پارٹی صدر ملکارجن کھڑگے، پارلیمانی پارٹی کی لیڈر سونیا گاندھی اور لوک سبھا میں اپوزیشن لیڈر راہل گاندھی کو ملک سے معافی مانگنی چاہیے۔

نئی دہلی، 15 دسمبر (یو این آئی) ملیالم فلموں کی معروف اداکارہ منجو وارئیر نے 2017 کے اداکارہ کے اغوا اور جنسی استحصال کے معاملے میں حالیہ فیصلے کو’’ادھورا‘‘ قرار دیتے ہوئے کہا ہے کہ مجرموں کو تو سزا مل گئی ہے لیکن جُرم کے پیچھے کا مبینہ ’ماسٹر مائنڈ‘ اب بھی آزاد گھوم رہا ہے۔اس ہفتے کے شروع میں اَرناکُلَم پردھان سیشنز کورٹ نے اس معاملے میں چھ قصورواروں کو 20 سال کی سخت قید کی سزا سنائی حالانکہ اصل ملزم اداکار دلیپ کو بری کر دیا گیا۔قابل ذکر ہے کہ دلیپ کی طلاق یافتہ بیوی محترمہ وارئیر نے جنسی استحصال کے دو دن بعد بیان دیا تھا کہ یہ معاملہ مجرمانہ سازش سے جُڑا تھا۔ ان کے بیان کے بعد ہی دلیپ کو اس معاملے کا ’ماسٹر مائنڈ‘ہونے کے الزام میں گرفتار کیا گیا تھا۔محترمہ وارئیر نے عدالت کے فیصلے پر رد عمل ظاہر کرتے ہوئے لکھا، ’’میں قابل احترام عدالت کا بے حد احترام کرتی ہوں لیکن اس معاملے میں متاثرہ کے لیے انصاف اب بھی ادھورا ہے۔ ابھی صرف جُرم کرنے والوں کو سزا ملی ہے۔ اس سنگین فعل کی منصوبہ بندی کرنے والا اور اسے انجام دینے والا دماغ چاہے وہ جو بھی ہو، اب بھی آزاد گھوم رہا ہے۔ یہ بے حد خوفناک ہے۔ انصاف تبھی پورا ہوگا جب اس جُرم کے پیچھے کا ہر فرد ذمہ دار ٹھہرایا جائے گا۔‘‘محترمہ وارئیر نے کہا کہ یہ مسئلہ صرف ایک متاثرہ تک محدود نہیں ہے، بلکہ ہر اُس لڑکی سے جُڑا ہوا ہے جو عزت کے ساتھ اس سماج میں جینا چاہتی ہے۔قابل ذکر ہے کہ جسٹس ہنی ایم ورگیس کے ذریعے دیے گئے فیصلے میں ملزمان کو جنسی استحصال کے ارادے سے اغوا (تعزیرات ہند کی دفعہ 366)، مجرمانہ سازش (آئی پی سی 120بی) اور اجتماعی عصمت دری (آئی پی سی 376ڈی) کا قصوروار پایا گیا۔ ہر قصوروار پر 50,000 روپے کا جرمانہ بھی لگایا گیا، جس کی ادائیگی نہ کرنے پر ایک سال کی اضافی قید ہوگی۔پہلے ملزم پلسر سُنی کو آئی ٹی ایکٹ کے تحت پانچ سال کی اضافی سزا ملی حالانکہ عدالت نے واضح کیا کہ تمام سزائیں ساتھ ساتھ چلیں گی۔ آٹھویں ملزم ملیالم اداکار دلیپ کو بری کر دیا گیا۔

الہ آباد:15دسمبر(یواین آئی) اترپردیش کے ضلع الہ آباد میں پیر کو مقابلہ جاتی امتحانات کے امیدواروں کی جانب سے اتر پردیش پبلک سروس کمیشن (یو پی پی ایس سی) کے احاطے کے گھیراؤ اور احتجاج کے پیش نظر پولیس انتظامیہ الرٹ پر ہے۔پبلک سروس کمیشن کے پورے علاقے کو چھاؤنی میں تبدیل کر دیا گیا ہے۔ وہاں پولیس کے ساتھ ساتھ آر اے ایف کے جوانوں کو بھی تعینات کیا گیا ہے۔ ڈرون کیمروں کے ذریعے پورے علاقے کی نگرانی کی جا رہی ہے۔ امیدوار کمیشن میں مبینہ بدعنوانی کے خلاف آج بڑی تحریک چلا رہے ہیں۔امیدواروں نے صبح 11:00 بجے یو پی پبلک سروس کمیشن کے گیٹ نمبر 2 پر احتجاج شروع کرنے کا اعلان کیا تھا جس کے پیش نظر انتظامیہ نے پورے علاقے کو چھاؤنی میں تبدیل کر دیا تاکہ کمیشن کے سامنے کوئی احتجاج نہ ہو سکے۔’سنیکت پرتیوگی چھاتر ہنکارمنچ‘ کی جانب سے تحریک کا پوسٹر بھی جاری کیا گیا تھا۔ امیدواروں کا مطالبہ ہے کہ کمیشن کی بھرتی کے امتحانات میں شفافیت لائی جائے۔ امیدوار پی سی ایس 2024 ابتدائی اور آر او و اے آر او 2023 ابتدائی امتحان سے متعلق مسائل پر ناراض ہیں۔الزام ہے کہ کمیشن کی جانب سے حتمی نتائج کے اعلان کے باوجود ترمیم شدہ جواب کی ’کی‘ جاری نہیں کی گئی تھی۔ تمام زمروں کے کٹ آف اور امیدواروں کے حاصل کردہ نمبرات پبلک نہیں کیے جا رہے ہیں۔ امیدوار مطالبہ کر رہے ہیں کہ مختلف بھرتیوں میں ابتدائی امتحان میں 15 گنا تک امیدواروں کو کامیاب قرار دیا جائے۔ امیدوار اپنے نمبرات شائع کرنے کا مطالبہ کر رہے ہیں۔یہ تحریک ’سنیکت پرتیوگی چھاتر ہنکارمنچ‘ کے کنوینر پنکج پانڈے کی قیادت میں ہو رہی ہے۔ پنکج پانڈے نے تحریک کو پرامن طریقے سے چلانے کی بات کہی ہے۔
انہوں نے کہا ہے کہ اگر تحریک کے حوالے سے سیاست ہوئی یا تشدد کرنے کی کوشش کی گئی تو وہ اسے ملتوی کر دیں گے۔