بی جے پی کے زیر اہتمام بھاماشاہ جی کے یومِ پیدائش پرتقریب کا انعقاد

تاجروں کا تحفظ حکومت کی اولین ترجیح، مجرموں کے لیے کوئی جگہ نہیں:سنجے سراوگی

جدید بھارت نیوز سروس
پٹنہ، 29 اپریل: بہار بی جے پی تجارتی سیل (کامرس سیل) کے زیر اہتمام آج عظیم مخیر اور بہادر شخصیت بھاماشاہ جی کے یومِ پیدائش کے موقع پر ایک خصوصی تقریب کا انعقاد کیا گیا۔ پٹنہ کے رویندر بھون میں منعقدہ اس پروگرام میں بی جے پی کے ریاستی صدر سنجے سراوگی نے بطور مہمانِ خصوصی شرکت کی۔ اس موقع پر ریاستی صدر سمیت تمام شرکاء نے بھاماشاہ جی کی تصویر پر پھول نچھاور کر کے انہیں خراجِ عقیدت پیش کیا اور ان کے نقشِ قدم پر چلنے کا عہد کیا۔تقریب سے خطاب کرتے ہوئے سنجے سراوگی نے کہا کہ بھاماشاہ نے ملک کے دفاع کے لیے اپنی زندگی بھر کی پونجی وقف کر دی تھی۔ انہوں نے موجودہ حکومت کا موازنہ ماضی سے کرتے ہوئے کہا کہ 2005 سے پہلے کا بہار سب کو یاد ہے، جب شادی بیاہ کی تقریبات کے دوران تاجروں کے شورومز سے گاڑیاں اور سامان زبردستی اٹھا لیا جاتا تھا۔ انہوں نے اطمینان ظاہر کیا کہ این ڈی اے حکومت میں تاجروں اور صنعت کاروں کو مکمل تحفظ اور احترام مل رہا ہے۔
سنجے سراوگی نے مزید کہا کہ 2005 میں نتیش کمار نے اقتدار سنبھال کر ریاست میں سُشاسن (اچھی حکمرانی) قائم کی اور اب اسی راستے پر چلتے ہوئے وزیر اعلیٰ سمراٹ چودھری بہار کو خوشحال بنانے میں مصروف ہیں۔ ریاست کے تاجروں کو یقین دلاتے ہوئے انہوں نے کہا کہ بہار میں جرائم کرنے والوں کو بخشا نہیں جائے گا۔ بھاگلپور میں ایک مجرم کے پولیس انکاؤنٹر میں ہلاک ہونے کا حوالہ دیتے ہوئے انہوں نے واضح کیا کہ مجرموں کے لیے اشارہ صاف ہے: “یا تو جرم چھوڑ دیں یا بہار چھوڑ دیں”۔انہوں نے بھاماشاہ کی حب الوطنی کا ذکر کرتے ہوئے کہا کہ ہلدی گھاٹی کی جنگ میں جب مہارانا پرتاپ کو وسائل کی کمی کا سامنا تھا، تب بھاماشاہ نے اپنی تمام دولت ان کے قدموں میں ڈال دی تھی۔ یہ قربانی ‘نیشن فرسٹ ‘ (ملک سب سے پہلے) کے جذبے کی عکاسی کرتی ہے اور بی جے پی کا ہر کارکن اسی سوچ کے ساتھ کام کر رہا ہے۔ انہوں نے نوجوانوں سے بھاماشاہ کی سوانح عمری پڑھنے اور ان کے خیالات کو اپنانے کی اپیل کی۔پروگرام کی نظامت سیل کے ریاستی کنوینر جگن ناتھ پرساد گپتا نے کی۔ تقریب میں سابق اسپیکر پریم کمار، منگل پانڈے، سابق گورنر گنگا پرساد، رام کرپال یادو، بھیم سنگھ چندرونشی، پٹنہ کی میئر سیتا ساہو اور دیگر کئی معززین موجود تھے۔ اس سے قبل سنجے سراوگی نے وزیر اعلیٰ سمراٹ چودھری اور نائب وزیر اعلیٰ وجے کمار چودھری کے ہمراہ پنائی چک پارک میں بھاماشاہ جی کے مجسمے پر گلہائے عقیدت پیش کیے۔