زمین سے محروم افراد کو زمین خریدنے کے لیے دیئے جائیں گے ایک ایک لاکھ روپے: سراؤگی

سمستی پور، 17 اپریل (یواین آئی) بہار کے محصولات و اصلاحات اراضی کے وزیر سنجے سراؤگی نے کہا ہے کہ ریاستی حکومت زمین سے محروم افراد کو زمین خریدنے کے لیے ایک۔ ایک لاکھ روپے کی مالی امداد فراہم کرے گی۔وزیر موصوف نے جمعرات کو سمستی پور میں صحافیوں سے گفتگو کرتے ہوئے کہا کہ ریاست کی تمام پنچایتوں میں زمین سے محروم افراد کی شناخت کے لیے ایک مہم چلائی جا رہی ہے۔ اب تک ایک لاکھ 24 ہزار بے زمین افراد کو اس مہم کے تحت نشان زد کیا گیا ہے۔انہوں نے کہا کہ حکومت کی جانب سے ایسے تمام افراد کو یا تو زمین دی جائے گی یا زمین خریدنے کے لیے ایک۔ ایک لاکھ روپے دیئے جائیں گے۔مسٹر سراؤگی نے مزید کہا کہ ریاست میں زمین کا سروے بھی جاری ہے۔ اگر اس کام میں کسی بھی افسر کی جانب سے لاپرواہی برتی گئی تو ان کے خلاف سخت کارروائی کی جائے گی۔